Nongstoiñ, Jymmang 20: Ka Khasi Students Union West Khasi Hills District Unit, ka la dawa na ka Deputy Commissioner ban da bishar bniah bha ha kaba ïa dei bad ka mat pynrung kyrteng lane khanasamari jong u snem 2027 u ban sa wan.
Ki nongïalam ka seng ka la leit ban ai jingthoh markhmat ruh bad ka Deputy Commissioner, ryngkat ki mat jingai jingmut ha kaba ïa dei bad ka kam ban da bishar bnïah, kata naduh ki rukom niew kiba ryntih bad pyrkhing kharai.
Ki nongïalam ka seng ba kynthup ïa u bah John Fisher Nongsiang President bad bah Franklin Syiemiong Secretary, ki la pynpaw ba ka West Khasi Hills District ka ïasam ïa u pud ïa sam bad ka jylla Assam, ka jan u pud u sam bad ka ri Bangladesh, kumta ka don ka jingpynwit bad jingma kaba khraw halor ka jingwan rung beaiñ jong ki briew nabar.
U Bah John Fisher Nongsiang u la ong, “Ngi la buh ka jingkyrpad hakhmat jong ka DC, ban pynmih ïa ki hukum kiba shai sha baroh ki nongñiew bad ki ophisar kiba dei peit ban bishar bniah bha ïa ka jinglong ki nongshong shnong ha ka por ba ñiew briew”.
“Ka jingbud ryntih ïa ki kyndon jong ka jinglum khanasamari ïarap ban ïoh ïa ka jingkheiñ kaba thikna halor ka jingshisha jong ki nongshong shnong bad ban khanglad ïa ki kam kiba rynkhing-rynkhaiñ ka long kaba donkam eh”, u la ong.
Shuh shuh u la ong, “Ka Seng ka kwah ruh ban pynkynmaw ba la lap ïa ki jingbym ïasyriem kiba khraw bha ha ki jingkheiñ jong ka khanasamari 2011. Kumba ka long ba ka ‘Literacy Rates ha Meghalaya ha ki Block Level, Census 2011’, ki jingthoh halor ka jingnang-jingstad ha ki katto katne ki Block jong ka West Khasi Hills District, ka ïapher na ka jingshisha katkum ki jaka”, bad bynrap, “Kine ki jingbym biang bad jingbakla ki ktah shibun ïa ka jingpynkhreh pynkham, ka jingsam pisa bad ka jingpyntreikam ïa ki skim pynroi”.
“Halor kine ki mat kiba la kdew haneng, ka seng ka kyntu kynpham ïa ka ophis DC Nongstoiñ, ban pynmih ïa ki hukum bad ki jingbthah kiba shai sha ki nongtrei bad ki nongñiew ïa ka khanasamari 2027, ban pynshisha ba ka jinglum jingkheiñ kan long kaba thikna, kaba shai, kaba khlem jingbakla”, u la ong.
