‘Ka Umsohpieng PHC ka jingangnud ki paidbah Nongtrai na u Nongmihkhmat’
Nangroi ki nongshong shnong, ki jait jingpang ruh ki nang bun: HYC
Nongstoiñ, Jymmang 20: Ki paidbah nongshong shnong jong ka thaiñ Nongtrai ba kynthup ïa ki palat 30 ei ei tylli ki shnong, ki la kyntu ïa ka tnad ka koit ka khiah jong ka sorkar jylla bad ïa u myntri ba dei peit ïa ka tnad ka koit ka khiah, ba un thaw ki lad ki lynti ban kyntiew kyrdan noh ïa ka Umsohpieng Sub Centre.
Ka sur na ki riew rangbah bad ki paidbah ka thaiñ Nongtrai, ka long ba katkum ka jingïaid jong ka por bad ka jingroi ki paidbah nongshong shnong, katei ka Sub Centre kam lah shuh ban shakri ïa ki paidbah. Ka jingdon ki nongshong shnong kat nang mih ki snem ka la nang roi bad ka jingdonkam ban pynbha na ka bynta ki lad jingsumar kiba kham biang, ka dei kaba hakhmat.
Kumta, ki la dawa na u Nongmihkhmat u ba long ruh u MLA ba don burom ba mynta, u ba don ruh ha ka liang ka sorkar, ba un thaw ki lad ki lynti ban pynurlong noh na ka bynta ban kyntiew kyrdan ïa ka Umsohpieng Sub Centre, na ka bynta ka jingmyntoi ki paidbah nongshong shnong bad ka jingdawa jong ka por.
Halor kane ka juh ka phang, ka seng Hynñiewtrep Youths Council Nongtrai Area unit na ka por sha ka por, ki la leit ban buh jingthoh hakhmat ka DMHO bad ïakynduh kyrpang ruh ïa ki nongmihkhmat ban dawa kyntiew PHC noh ïa ka Umsohpieng Sub-Centre kaba dei ka jaka ai jingsumar ïa ki paidbah ka thaiñ Nongtrai baroh kawei.
“Ka seng hadien ba ka la peit pyrman bha ïa ka jinglong jingman ha ka thaiñ Nongtrai, ka la I dei ban dawa noh da ka Umsohpieng Public Health Centre ha ka jaka jong ka Umsohpieng Sub-Centre, katkum ka jingdonkam jong ki shnong kaba la kot haduh palat 30 tylli ki shnong ba katei ka Centre ka la dep ban ai kajuh ka jingshakri da ki bun bun phew snem”, pynpaw u President ka seng HYC Nongtrai Area Unit bah Blaster Sohmat.
“Ka por ka la biang eh ban kyntiew kyrdan bad ban wanrah ki lad jingsumar kiba kham bha katkum ka jingiaid jong ka por bad ka jingroi ki nongshong shnong, khnang ban lah ban teh lakam ruh halor ki jait jingpang kiba bun jait bun rukom”, ong u President haba ïakren bad u nongthoh khubor.