Shillong, Jymmang 20 : Ki Shipai jongki 12 tylli ki ri jong ka khyndew bah Asia ba shathie ki la wan ban ïashim bynta ha ka jingkilan met ban pyntbit shuh shuh kaba la pynlong da ki shipai ka India ha Umroi Military Station kaba la tip kum ka Exercise PRAGATI 2026. Kane ka jinghikai kilan met kan neh kumba ar taiew ei ei bad ka jingpyntbit ka long halor ki jingïaleh pyrshah ïa ki kam lehnoh, jingïakhun thma sha khlaw ne shalor ki lum ba khohruh khohram.
Ki shipai kiba la wan ki dei na Bhutan, Cambodia, Indonesia, Laos, Malaysia, Maldives, Myanmar, Nepal, Philippines, Seychelles, Sri Lanka bad Vietnam.
ïa kine baroh ki shipai la pdiang sngewbha mynta ka sngi da ki Shipai ka India haba ki la wan poi ha katei ka jaka da kaba la pynlong da ki prokram shad tynrai.
Ka Partnership of Regional Armies for Growth and Transformation in the Indian (PRAGATI) ka dei ka prokram ba la pynlong ban wanrah ïa ka jingpynkhlaiñ ka jingïadei paralok, ka jingïa burom mar kylliang bad ka jingpynïaryngkat kyrdan lang mar kumjuh.
Kane ka prokram ka ailad ïa ki shipai jong kine ki ri ban don ka jingïajan, ka jingïaphylliew jingmut mar kylliang, ka jingïa pashat jingtip markylliang bad kumta ter ter.
Haba kren ha ka jingïalang u Additional Director General of Infantry, jong ki shiapi India u Major General Sunil Sheoran u la ong kiba kum kine ki jingïa kilan met lang ki long kiba donkam na ka bynta ban ïada ïa ki ri. U la pdiang sngewbha ïa baroh ki shipai na kitei ki 12 tylli ki ri bad u banjur halor ka jingdonkam ban ïatreilang ha ka ban wanrah ïa ka jingïakhun pyrshah ia kino kino ki jingeh kiba don hakhmat.
U la kyntu ba kin ïaphylliew jingmut da ka jingkhuid mynsiem, da ka jingïaburom mar kylliang bad kumjuh ruh ban kloi ban pdiang ïa kino kino ki jingkdew bad pyni jingmut lang jong kiwei.
Kane ka jingkilan met ka long ym tang ban pynkhlaiñ ïa ka met ka phad, hynrei ban wanrah ïa ka jingïaburom mar kylliang ka jingïatrei lang ha kino kino ki bynta.
