Pynksan ka ïingbishar HC ban set phatok 20 snem ïa u nongthombor ïa ka hep kynsi ba dang khynnah

Shillong, Jymmang 20 : Ka ïing Bishar High Court jong ka jylla ka la pynksan ïa ka hukum jongka ïing Bishar POCSO Nongstoin ban rai pynrem ïa u Rishan Marwein namar ka jingleh beijot ïa la ka jong ka hep kynsi ba dang khynnah da kaba rai set phatok ïa u haduh 20 snem.
Ka ïing Bishar kaba la shong bishar ba kynthup ïa ka Chief Justice Revati Mohite Dere bad Justice W Diengdoh, ha ka hukum ba pynmih ha ka 18 tarik Jymmang, ka ong ba ka kam tuklar halor ka hukum ba 22 tarik Nailur, 2023 ba la pynmih da ka Special Judge (POCSO) West Khasi Hills, kaba shem ba u Marwein ula leh ïa ka kam bymman kaba hap hapoh ka kyndon 6 jong ka POCSO Act, 2012.
Ka ïing Bishar kala hukum ban set phatok ia u haduh 20 snem bad ka kuna ba 30,000 tyngka, nalor sa lai bnai lada um lah siew ïa ka kuna. Ka ïing Bishar POCSO ka la ai jingmut ruh ban siew bai lutksan ba 1 lak tyngka sha ka lanot lyngba ka Meghalaya State Legal Services Authority.
Kane ka mukotduma ka don jingïadei bad artylli ki jingjia ha u bnai Risaw 2020. Ka hukum ka ong ba u Marwein, uba shongkha bad ka hymmen kane ka khynnah bad don arngut ki Khun, ula leit shaw ïa kane ka khynnah ba 16 nem na skul ha ka 12 tarik Risaw, 2020 bad ïalam bam ïa ka ha Aroma Restaurant ha Nongstoin bad leh khlem akor ïa ka ha paiñkhana. Ula leh khlem akor biang ïa ka ha ka 17 tarik Risaw, 2020 ha la ka jong ka ïing ha ka por ba ka kurim kam don satia.
Kane ka khynnah kala pyntip ïa kine ki jingjia sha ki Kmie Kpa ha ka 18 tarik Risaw, 2020, ha kaba ka Hynmen, kala ujor ïa ka ejahar ha Nongstoin Police Station ha ka 20 tarik Risaw, 2020. Ha ka por ba iaid ka jingbishar, ka khynnah, ka la phla ba hadien ba dep bam ha Restaurant, u Marwein ula bat ïa ka na kti bad patan sha paiñkhana,u doh ïa ka, pynlaw jaiñ ïa ka, u law jain ïalade bad leh beijot ïa ka.
Ka ïathuh ba ka jingjia kaba ar ka la jia ha ka ïing ka hynmen haba ka leit ban kren ïa u ba kam treh shuh ban bteng kane ka jingïadei marmet. Ka ïathuh ba u Marwein ula shim ïa ka blade bad byrngem ban ot ïalade ha ban da iap, lada ka ieh ïa u. “Ka sngi kha jong ka, kat kum ka syrnot sngi kha bala ai da u Kpa jong ka ka long 16.03.2004”.
U Nongïasaid Aiñ HS Shangreiso, uba mihkhmat ïa u Marwein, ula ïasaid ba ka jingïadei jong ki ka dei kaba ïamon lang bad shaniah ha ki artylli ki hukum ka ïing Bishar ban pynksam ba kam dei ka kam leh beijot.
U nongïasaid aiñ ka Sorkar R Gurung ula kynthoh pyrshah da kaba ong ka jingmynjur lang kam shongnia satia naba kane ka khynnah ka dei kaba dang 16 snem bad ong ba u Marwein ula pyndonkam bakla ïa ka jingïadei bad la ka hep kynsi.
Ka ïing Bishar ka la pynksan ba hapoh ka POCSO Act, ka jingmynjur ba la ai da ka khynnah ba hapoh ka 18 snem ka dei ka bym shong nongrim bad ïahap bad shem ba ki hukum ba la kdew da u nongkyrpad, ka dei kaba lah ban pynïapher shai”.
Ka ïing Bishar ka la hukum ïa u Secretary ka District Legal Service Authority ka West Khasi Hills, ba un ai ïa ka kaiphod hapoh ka hynriew taiew la lah ai ne em ïa ka bai lutksan ba 1 lak tyngka sha kane ka khynnah.
ïa kane ka mukotduma la buh ban bishar biang ha ka 18 tarik Jylliew, 2026.