10 snem ha phatok rai ka ïingbishar HC ban set ïa u briew uba thombor ïa ka khynnah ba 16 snem

Shillong, Jymmang 20 : Ka ïing Bishar High Court ka la pynksan ïa ka hukum set phatok ba 10 snem ïa u briew uba leh beijot ia ka khynnah 16 snem, kaba la paw pyrthei ym na ka ejahar sha ki Pulit hynrei na ka jingpom u pyrthat haduh arsien ïa ka ïing, kaba la ngeit da ki Khasi ba ka pyni ïa ka jingdon ki kam bymman ha kane ka longïing.
Ka ïing Bishar Division Bench ka Chief Justice Revati Mohite Dere bad Justice W Diengdoh, ha ka 18 tarik Jymmang, ka la kyntait ban pdiang ïa ka jingkyrpad jong u Banteilang Sohshang, da kaba pynskhem ïa ka hukum ka Special Judge ka POCSO Court ka West Khasi Hills, ban set along ïa u hapoh ka kyndon 5(I)(n)/6 jong ka Protection of Children from Sexual Offences (POCSO) Act, 2012.
Kane ka Khynnah kaba dang don hapdeng 16 bad 17 snem, kala shah leh bymman bun sien hapdeng u bnai Lber bad Naitung 2016 katba ka dang sah ha ka ïing ka kmienah, kaba une u nongleh bymman u sah. Kane ka khynnah ka khlem pyntip ïa kane ka jingjia shano shano ruh namar u nongleh bymman ula byrngem ban pyniap ïa ka.
Kane ka kam bymman ka la paw pyrthei ha u bnai Jymmang 2016 da ka jingpom u pyrthat haduh arsien ïa ka ïing.
Haba shimkhia ïa ka rukom ngeit ki Khasi ba kum kine ki jingpom pyrthat ki pyni ïa ki dak ba don ka jingleh bymman ha kane ka ïing, ka Kmie jong une u nongleh bymman ka la khot ïa ki bahaïing hasem bad une u briew ula phla ba ula leh beijot ïa kane ka khynnah.
Ka Kmie une u briew ka la pyntip sha ka kmienah kane ka khynnah, kaba la pyntip pat sha ka Kmie ïa kaei kaba la jia. Ka kur ka la lum ïa ka jingïalang ban ïakren ïa kane ka kam hynrei kam shym la lah ban shim ïa kano kano ka rai, kaba la lam sha ka jingujor ïa ka ejahar.
Ka ïing Bishar ka la kyntait ïa ka jingkam jong une u nongleh bymman ba ula leh ïa kane ka kam da ka jingïamynjur lang. “Ka jingmynjur jong ka khynnah ka dei ka bym shong nongrim” ong ka ïing Bishar haba shim khia ba kane ka khynnah kala ïai phla ba une u briew ula leh beijot jubor ïa ka ha ka jingphla jong ka.
Ka ïing Bishar nalor kata, kala pynpaw ba une u nongleh bymman u khlem phla ba dei ka jingmynjur lang ha ka jingbatai jong u ïa kaei kaba jia hapoh ka kyndon 313 CrPC. Ka jingphla jong u sha ka Kmie bad ki bahaïing ruh, ka dei kaba la pynskhem da ki sakhi medical na u Dr WR Nongkhlaw ka Nongstoin Civil Hospital nalor ki jingphla jong kiba bun ki nongai sakhi- kynthup ka Kmie une u nongleh bymman, kaba la wan mih kum ka prosecution witness.
Ka ïing Bishar ka la pynksan ïa ka hukum ka Special POCSO Court ban siew bai lutksan ba 50,000 tyngka sha kane ka khynnah bad ka jinglut jingsep ha ki jingsumar, ka ban siew da ka Meghalaya State Legal Service Authority.
La bthah ïa ka District Legal Service Authority, West Khasi Hills, ba kan ai ïa ka kaiphod ba la pyntreikam ïa ka hukum hapoh ka hynriew taiew. ïa kane ka kam la buh ban bishar biang ha ka 18 tarik Jylliew, 2026.