Nongpoh, Jymmang 19: Ka jingïalap ha baroh kawei ka ri ha kaba ïadei bad ka jingpyntreikam ïaki skhim sorkar naki tnad bapher bapher ba ki paidbah kim dei ban shah iehnoh ne shah kyntait kaba la tip kum ka Jan Bhagidaari – Sabse Door, Sabse Pehle la pynlait paidbah mynta ka sngi ha Ri-Bhoi District ha ka jingïalang kaba la long ha Conference Hall jong ka DRDA ha Nongpoh.
Ïa katei ka prokram kaba kyrpang la pynlait paidbah da u Raja Brahma Additional Deputy Commissioner ka Ri-Bhoi District ba dei ruh u Project Director ka SRES-DID, Ri-Bhoi District haka jingdonlang ki ophisar naki tnad sorkar bapher bapher.
Lyngba kane ka prokram ha kane ka sngi la pynshai ruh halor ka thong bad ka jingdonkam jong kane ka prokram ban pynpoi ïa ki skhim sorkar wat shaduh ki kyndong kynshrot ka district, khamtam ki shnong kiba dang duna ka roi ka par bad ka ïoh ka kot ba baroh kiba dei hok ban ïohpdiang ïa ki skhim sorkar kim dei ban shah kyntait ne shah iehnoh.
Ban pynthikna ba kane ka prokram kan long kaba seisoh bad ïaid beit ka jingïatreilang jong baroh ki tnad sorkar ka long kaba donkam khnang ba baroh ki skhim sorkar kin treikam ha ka rukom kaba dei bad kaba biang bad kan kot ruh katkum ka thong kumba la angnud bad yn lah ban pyntreikam hok ïaki skhim sorkar sha ki shnong bapher bapher ka district.
