“Ka Jaiñtia Hills kam dei satia ka ATM jong ka Shree Cement,” kynthoh ki paidbah ïa ka kompeni

Shillong, Jymmang 18: Ki ar tylli ki seng na Jaiñtia Hills District kaba kynthup ïa ka Jaiñtia Student union (JSU) bad ka Jaiñtia National Council ha ryngkat ki longkmie ki longkpa ki paidbah jong ka shnong Daistong East Jaiñtia Hills District ki la wan sha Shillong ban leit tur sha Secretariat ban pynpaw pyrshah ïa ka jingthmu ka Meghalaya State Pollution Control Board ban pynlong ïa ka jingbishar paidbah ban buh ïa ka M/s Shree Cement Limited ha shnong Daistong ha ka 22 tarik mynta u bnai.
Ha kane ka sngi kila don palat spah ngut ki dkhot na ka JNC, JSU ki riew paidbah na ka shnong Daistong kila ïalum hakhmat u Mot Kiang Nangbah pyrshah ka Civil Hospital bad na katei ka jaka kila ïa ïaid ryngkat ka jingthoh ha ki placard ban tur sha Secretariat hynrei na ka liang jong ki pulit ki la khang lynti noh ha Mawbynna pyrshah ka State Central Library Shillong bad ha ki jingthoh ki la kyntu ïa katei ka kompeni ba ka dei ban leit phai noh sha la ka jaka la jong da kaba ong ba ka Jaiñtia Hills kam dei satia ka ATM jong ka.
Haba kren ha kane ka sngi u Bah Sambormi Lyngdoh President ka JNC haba kren u la ong ba ka jingpyrshah jong ki ka dei ba kane ka kompeni kam shym la bud ïa ki kyndon bad u la kynnoh ruh ba kam shym la burom ïa ka Jaiñtia Hills Autonomous District Council namar kam shym paw ka kyrteng jong ka bad la kynnoh ba ïa ki kot ki sla la leh bad pynbiang na ka jylla Gujarat.
U la kynnoh ba kane ka jingleh ka dei ka jingleh donbor ha kaba kam shym don shuh kata ka jingsngap ïa ka jingud jingnam ki trai shnong dei halor kane ka nongrim ba ki sa ïaleh pyrshah.
Na ka liang u President ka JNC u la kren shai ba kane ka jingïakhun mynta ka long pyrshah ïa ka sorkar MDA bad lada donkam ba kin leit kanbas pyrshah ha kane ka elekshon MP shiteng samoi kin hap ban leit namar ka jingïakhun ka long pyrshah ïa ka sorkar MDA.
Shuh shuh u la ong ba lada ïa ka Taj la lah ban pynsangeh lada ka sorkar ka don ka mon ka lah ban pynsangeh ïa ka jingbishar paidbah (Public Hearing) ba la buh ban long 22 tarik mynta u bnai, 2026.
Ha ki placard ba la rah da ki paidbah la thoh ba ki la kyntu ïa ka Shree Cement ba ka dei ban leit phai noh bad ong ba ka Jaiñtia Hills kam dei satia ka ATM jong ka, nangta ki la thoh ruh naba ka jingïoh ïa ki kot kam dei na kane ka jylla katei ka kompeni kadei kaba beaiñ, nalor kiwei kiwei pat ki jingthoh.