Ka jingdon ka Petrol, Diesel bad LPG ha Jylla Meghalaya ka biang, pynthikna ki kompeni umphniang
Shillong, Jymmang 18: U State Level Coordinator for Oil Industry, Meghalaya-cum-Manager (LPG-Sales), Shillong Area, Indian Oil Corporation u la pynthikna ïa ki paidbah ba ka jingdon jong ki mar umphniang ba kongsan, kynthup ïa ka Petrol (MS), Diesel (HSD) bad ka Liquefied Petroleum Gas (LPG), ka long kumba ju long bad khlem jingthut ha baroh ki lad pynpoi umphniang jong ki kompeni kiba pynïaid ïa ka umphniang-ka Indian Oil Corporation Limited (IOCL), ka Bharat Petroleum Corporation Limited (BPCL) bad ka Hindustan Petroleum Corporation Limited (HPCL) -ha kylleng ka Jylla.
Ka jinglong jingman jong ka jingpynbiang baroh ka dang ïai bteng ban long kaba skhem bad kaba biang.
Ki kompeni die umphniang ki la pyntip ba ka jingpynpoi umphniang baroh, naduh ki terminal bad ki jaka buh umphniang haduh ki jaka die umphniang, ki treikam bha bad khlem kano kano ka jingthut. La buddien man ka por ïa ka jingdon ka umphniang bad ki kam pyndap umphniang ki ïaid beit ïaid ryntih ha baroh ki jaka ha ka Jylla.
La ong shuh shuh ba ka jingpynpoi LPG sha ki nongpyndonkam hapoh ka ri ka long kaba la buh hakhmat eh bad ka dang ïai bteng ban long kumba ju long ha kylleng ka jylla Meghalaya. La buddien ïa ka jinglong jingman ban pynthikna ïa ka jingpynpoi kaba khlem jingthut sha baroh ki nongpyndonkam.
Ki kompeni die Umphniang ki dang pynneh ïa ka jingïatreilang kaba jan ha kaba ïadei bad ka jingpynpoi mar, ka jingpynkit ïa ki mar bad ki kam die khutia ban pynthikna ïa ka jingdon jong ka umphniang khlem jingeh ha kylleng ka thaiñ. La kyrpad ïa ki paidbah ba kin long kiba sngewskhem bad ban bteng ïa ka rukom pyndonkam kumba ju long.
Haba pynthikna ïa ki nongshong shnong, ki kompeni die umphniang ki la ong ba kam don ka daw ban sngewkhia bad la kyrpad ïa ki nongpyndonkam ban kiar na ka jingthied kyrkieh. La bthah ruh ïa ki paidbah ba kin shaniah tang ha ki jingpyntip ba thikna na ki Kompeni die umphniang na ka bynta ki jingtip kiba thikna bad kiba la pynshisha ha kaba ïadei bad ka jingdon ka umphniang.