Shillong, Jymmang 18 : Ka Drug Reduction, Elimination and Action Mission (DREAM) ka la sdang ïa ka sorjamin (survey) kaba bniah ha ka Jylla halor ka kam dih droks, da ka jingthmu ban lum ïa ki jingkheiñ halor ka jingdon, ka rukom long bad ka jingktah jong ka jingdih droks ha kylleng ka Meghalaya ban lah wanrah ïa ka policy kaba pynshong nongrim kat kum ki sakhi.
Kane ka sienjam ka bud ïa ka Memorandum of Undertanding (MoU) ba la ïasoi hapdeng ka DREAM Mission bad ka Sankardev College ha u bnai Nohprah 2025.
Ka sorjamin ka thmu ban lum jingkheiñ bad ki jingtip haba ïadei bad ka jingdon ki nongdih droks, bad ka jingktah jong ka jingdih droks ha kylleng ka Jylla Meghalaya, ka ban ïarap ïa ka Sorkar ban kan thaw ïa ka policy bad pynkhlaiñ ïa ki lad jingïada, jingsumar bad ki buit ai jingïïarap.
Kane ka jinglum jingkheiñ ka long kongsan bha namar ki jingtip kiba ïapher bad ba ïalong mar khongpong kiba don mynta haba ïadei bad ka jinglong jingman ba mynta bad ka jingdon ki nongdih droks hapoh ka Jylla.
Ka sorjamin kan sdang kum ka pilot project ha Shillong hashuwa ban pynïar sha kiwei pat ki bynta jong ka Jylla.
Hadien ka jingïoh pdiang ïa ki jingbit kiba donkam, ka sorjamin kan sa sdang hi noh shen.
Ia ka sorjamin la ot ribbon ha ka sngi Nyngkong da u Director ka DREAM Bah Francis Kharshiing ha Sankandev College ha ka jingïadonlang ka Principal Dr Eureka FP Lyngdoh, Vice Principal K Chyne, ki nonghikai bad ki nongmihkhmat jong ka DREAM Mission nalor ki dkhot ka Meghalaya User’s Forum (MUF) bad ka Meghalaya Drugs Users Network (MeDUNET).
Haba ai jingkren, u Bah Kharshiing ula ong “Kane ka sienjam ka pyni ïa ka jingkut jingmut hok jong ka Sorkar ha ka ban leh eiei pyrshah ïa ka jingdih droks lyngba ka jingpeit bniah jong ka stad saian, ka jingwad bniah, bad ka jingthaw polisi kaba bniah.”
Ula bynrap “Ki jingkheiñ ba la lum lyngba ka sorjamin kin shim ïa ka bynta kaba kongsan ha ka ban pynkhlaiñ ïa ki sienjam ban shim hadien habud bad ban pynkhlaiñ ïa ki lad ki lynti ban tem hapoh ka Jylla.
U Mission Director ula ong ruh ba ka “ Ka lynti ba ïohi jngai jong ka Sorkar ha ka ban leh eiei ïa u droks ka dei ïa ka ban hap ai jingïaroh, khamtam ïa ka jinglong nongïalam u Myntri Rangbah Conrad K Sangma, uba la wanrah ïa ka DREAM Mission”.
Ka DREAM Mission ka pynpaw ka jingsngewnguh ïa ka Sankarden College bad E Tariang, Head of Department, Statistic, u ban ïarap ïa ka sorjamin.
