Nongstoiñ, Jymmang 18 : Naduh ba ka thaiñ Parïong ka la ïoh ïa ka Primary Health Centre kaba don ha madan Pathew ki paitbah ka la la long ka jingkyrkhu kaba khraw ïa ki paitbah jong ki bun phew tylli ki shnong kata naduh Nongshilong, Mawkohngei, Mawlaisyiem, Umkrem, Parïong, Nongdom, Dommawlieh, Rngisawlia, Peiñlang Lawbyrtun, Mawkyllei, bad kiwei iwei ki shnong kiba don ha katei ka thaiñ.
Wat la katei ka PHC ka la dep don hynrei katba nang mih ki sngi ki shong ki la nag bun ka jingbun briew ka la nang kiew bad ki jingpang jingshitom ba bun jait ruh ki nang kynrei kumta ka jingshakri ïa ki paitbah tang lyngba ka Primary Health Cnetre kam long shuh kaba paka .Haba phai ha ka jingnang kiew jong ka jingbun briew na ka snem sha ka snem ka por ka la dei eh bad ka la biang palat ba ka sorkar kan kyntiew kyrdan noh ïa katei ka Primary Health Centre sha ka Community Health Centre.
Haba phai sha ka jinglong jingman ha kine ki sngi ym lah ban len ruh ba bun bah ki samla napoh ka jylla ki hap ban ïabeh ban lei twat kam sha kiwei pat ki jylla bad wat shabar ruh namar ka jingkyrduh kam hapoh ka jylla la jong. Ha ka jingwad jingtip jong u nongthohkhubor jong u Mawphor la shem ba ki don kumba shihajar ngut tam ki samla napoh ka jylla kiba trei ha ka tnad ka koit ka khiah ha kiwei pat ki jylla jong ka ri india kynthup ruh ïa kiba trei ha ki jylla ka thaiñ shatei lam mihngi khlem da kheiñ ïa kiba trei sha kiwei pat ki ri.
Haba tih bniah ha kaba ïadei bad ka jingïabeh jong ki samla napoh ka jylla ban leit trei ha ka tnad ka koit ka khiah sha kiwei pat ki jylla la shem ba ka daw kaba kongsan ka dei ka jingbym lah jong ka sorkar ban thung kam ha baroh ki post kiba lait ha man la ki jaka sumar la ka dei ha ki Sub Health Cntre, Primary Health Centre , Community Health Centre, Civil Hospital bad kiwei kiwei ki jaka sumar kiba hap ha ka jingpynïaid jong ka sorkar.
Kumta ban wanrah ïa ka jingkoit jingkhiah kaba paka sha ki paitbah nong shong shnong hapoh ka jylla ka sorkar ka la dei ban phai dien sha baroh ki jaka sumar kiba la dep don naduh mynshuwa bad ban shim jingkheiñ ïa ka jingtrei kam jong kawei pa kawei ka jaka sumar hapoh ka jylla bad ban pyndap pura ïa ki nongtrei kat kum ka jing don kam. Ym lah ban len ruh ba tang ha ki lai tylli ki district kata ka West Khasi, hills South West Khasi hills bad Eastern West Khasi hills lada ka sorkar kan thung pura ïa ki nongtrei habaroh ki jaka sumar ki samla ki ba ïoh ban trei kin don palat arhajar ngut.
