Shillong, Jymmang 18 : Ka sorkar jylla ka dang ap ïa ka jingmynjur jongka sorkar pdeng na ka bynta ki Iew Khappud bad kumjuh ruh ki Land Customs Stations (LCS) ha shi lynter ki bynta khappud ka India bad Bangladesh, ïathuh u Symbud Myntri Rangbah ka jylla u ma Sniawbhalang Dhar mynta ka sngi.
Ka sorkar jylla ka la phah bun ki jingtyrwa sha ka sorkar pdeng na ka bynta kitei ki ïew khappud bad ki LCS bad ka dang ap ïa ka jingmynjur ka sorkar pdeng. “ Ngi dang ap ban ïoh ka jingmynjur na ka sorkar pdeng” ong u ma Sniawbha.
U la ong “ Namar ba kane ka dei ka kam kaba ïadei bad ki ar ri kumta hap ïoh ka jingmynjur ruh na baroh ar tylli ki ri namar tang ka India kam lah satia ban plie bad tang ka Bangladesh ruh kam lah satia. Kumba long mynta baroh ki ar tylli ki sorkar jong ka India bad Bangladesh ki dang bishar bniah halor kine ki jingtyrwa”.
