Ka Assam bad Meghalaya ki don ïa kajuh ka thong ban pynbeit noh ïa ka jingkajia pud : AL Hek

Shillong, Jymmang 18 : U MLA ka Pynthorumkhrah ba dei ruh u Myntri barim ka sorkar Jylla, Bah AL Hek ha ka sngi Nyngkong u la ong ba ka sorkar Assam bad kumjuh ka sorkar Meghalaya ki dang ïatreilang ban pynbeit ïa ka jingïakajia pud hapdeng ki Jylla kaba la sahteng la slem bha.
“Na ka liang ka sorkar Meghalaya bad Assam ki dang ïa kren ban pynthikna ba ha kawei ka sngi kin poi sha ka jingkut jingmut ba kin lah ban weng ïa kane ka jingeh,” ong u Bah AL Hek haba kren bad ki lad pathai khubor.
Da kaba pynpaw ba ka don ka jingpynbor la ka long na Meghalaya bad kumjuh na Assam halor kane ka ishu hynrei u Bah AL Hek u la ong, “Dei na kane ka daw ba ngi baroh la ka long na ka BJP, NPP lane ka sorkar jylla ngim kwah ban pynbor ïano ïano hynrei ngin trei beit da ka lynti kaba dei bad kaba jai jai.
Ha kajuh ka por u la ïathuh ba ka jylla ka la don la ki jong ki Border Committee jong baroh ki district. “Kumta lada ïakren ïa ka Block I bad II, bad ha Ri Bhoi, ki la ïoh la ki jong ki jong ki komiti, kiba la khlieh da ki MLA na ki seng saiñpyrthei bapher bapher ban pynbeit ïa kane ka kam.”
Nangta u la ong ruh ba ïa kine ki ishu kiba heh yn ym lah satia ban lah pynbeit tang ha kawei ka sien shong jingialang. “Phi don shibun ki kynhun sorjamin na ka Sorkar India, na ka sorkar Jylla. Kumta ki don shibun kiei kiei ban ïakren. Kam dei ba da kaba shong sha shiliang ka miej ngi lah ban pynbeit ïa kata ka jingeh. Ngi hap ban leit markhmat sha ki jaka bad ïohi bniah ïa ka jingshisha. Shisien ba phi la sngewthuh ïa ka jingshisha ha kato ka jaka nangta ki lah ban tip kumno ban pynbeit ïa ka jingeh.”