Nongpoh, Naitung 17: U Bah Mayral Born Syiem MLA ka Nongpoh Constituency u la pynpaw ba ka Ri-Bhoi District kaba dei kawei naki district haka jylla kaba la shah jied kum ka Aspirational District kala dei hok ban ioh noh ïaka Medical College naka bynta ka jingmyntoi jong ki khun samla bad ki samla pule ka jylla kaba la donkam eh, namar haduh mynta ka jylla kam pat don ïaka Medical College ba ki samla pule ki dang hap beit ban leit pule shabar.
Haba kren sha ki lad pathai khubor u Bah Mayral Born Syiem u la ong ka Ri-Bhoi District kala dei hok ban ioh noh ïaka Medical College katkum ki kyndon jong ka Niti Aayog, ha kaba naka liang jong u kum u MLA u la ju kren ïa kane ka mat naka por shaka por ban ai ruh da ka jingthoh ban pynsngew sha ka sorkar ba ka dei ban shimkhia bad ban pynthikna ba ka Ri-Bhoi District ka dei ban ioh noh ïaka Medical College.
“Kum u MLA nga la ju buddien ruh ban peit bad khmih ïaki jingdonkam bad pynbha ïaki Sub-Centre, PHC, CHC naka bynta ban kyntiew ïaka tnad ka koit ka khiah ban ai ka jingshakri kaba paka naka bynta ki paidbah, bad kawei naki mat kiba donkam bha mynta ka dei ka Medical College kaba nga la ju ïakren naka por shaka por bad ka sorkar ba ka Ri-Bhoi District kala don hok ban ioh hadien ba kadei tang kawei ka district kaba la rung shaka thup jong ki 117 tylli ki Aspirational District haka ri baroh kawei” la ong u Bah Mayral Born, da kaba bynrap ruh ba ka sorkar jylla, naduh u Myntri Rangbah, ka tnad ka koit ka khiah, ki dei ban shimkhia bad pynthikna hapoh une u snem ba ka dei ban pynioh noh ïa kawei ka Medical College ha Ri-Bhoi District.
U la kyntu ruh ïa kiwei pat ki 4 ngut ki MLA ka Ri-Bhoi ba ki dei ban don ka jingïatreilang ban pynbor ïaka sorkar ba ka dei ban shimkhia bad shim kabu katba ka sorkar India lyngba ka Niti Ayog ka dang ithuh ïaka Ri-Bhoi District kum ka Aspirational District haka jylla namar lada ki 5 ngut ki MLA jong ka Ri-Bhoi ki don ka jingïatreilang khlem da kheiñ ïaka party kaba ki don, ka Secretariat kan khih win naka bynta ka jingmyntoi ki khun samla ryngkat ka jingkyrshan jong ki paidbah.
U la ong ruh ka Dhubri District jong ka jylla Assam kaba dei kawei naki Aspirational District dang shen ka sorkar kala dep ban mang pisa naka bynta ban tei noh ïakawei ka Medical College, dei nakata ka daw ba ka Ri-Bhoi District ruh kala don hok ban ioh noh, bad kyrpad ruh ïaki baroh 4 ngut ki MLA ka Ri-Bhoi ba kin ai ka jingïatreilang ryngkat ryngkat bad ka jingkyrshan jong ki paidbah bad naka liang jong u kum u MLA un dang iai buddien khnang ba katei ka jingangnud ban ioh noh ïaka Medical College kan urlong ha Ri-Bhoi District.
