Mynta yn khlong ïa ka met u samla ba kynnoh shah pynïap ha shnong Pynter

Shillong, Jymmang 17: Ka seng Federation of Khasi Jaiñtia and Garo People, Riwar Mihngi Circle, ka la pynrem jur ïa ki jingjia ba la kynnoh ba la leh da ka VDP kaba ïadei bad ka jingkhlad u samla hapoh ka shnong Pynter bad na ka liang ka seng ha kajuh ka por ka dawa ban pynïoh ka jingbishar kaba hok ïa ka ïing ka sem jong u samla Khongmawloh.
Ha kawei pat ka liang ka khubor ba la ïohlum la ïathuh ba ka met jong u samla ba la 27 snem ka rta u Trophimos Khongmawloh na ka shnong Pynter la thmu ban khlong biang ha ka sngi saitjaiñ taïew ba la dep, hynrei la ïathuh pat ba ïa kane ka kam khlem lah satia ban pyndep na ka daw jong ka jingjur jingtwa khyndew kaba la khanglad ban ïoh leit ïaid sha katei ka thaiñ, kaba dang hab hapoh ka Pynursla civil sub division.
Ki tyllong khubor ki ïathuh ruh ba ka jingkhlong ïa ka metïap ba la tep jong utei u samla la buh ban pyndep ha ka sngi nyngkong ka 18 tarik mynta u bnai, hynrei kane ruh ka shong ha ka jinglah ban pyndep bad ban pynkhuid lut ïa ka khyndew kaba la twa ha katei ka thaiñ.
Lah ban pynkynmaw ba ki pulit ka East Khasi Hills ki la ïoh ka jingai jingbit ban khlong biang ïa ka metïap utei u samla, uba la kynnoh ba u la shah bom shah tied da ki bor pynïaid shnong haduh ban da khlad ha kaba kane ka la jia ha ka 7 tarik mynta u bnai.
Halor kane ka jingjia jong ka jingkhlad noh u samla Khongmawloh ka la wanrah ruh ka jingsngewkhia kaba jur hadien ba u kpa jong u, u Netnobiweit Khongsdoh, u la ujor da ka ejahar halor kane ka jingkynnoh ba shah pynïap.
Hadien ba la dep ban ujor da ka ejahar, na ka liang ki pulit ka East Khasi Hills ki la pynrung hapoh ka kam pynïap briew ha kaba ki la register case ïa ka, hynrei la ïathuh pat ba ki 11 ngut kiba la kynnoh ba ki la shah suba jur ki la ïoh jamin ne ka anticipatory bail ban lait na ka jingshah kem.