Shillong, Jymmang 17: Ban ïarap ïa ki khynnah skul naduh dang khynnah haduh ban kynjoh jinglong samla lud jong ka jylla Meghalaya kiba don ka jingeh ha ka bor pyrkhat, kiba sngew khuslai sngew mong ban leit sha ki jaka pule ïoh shah keiñ beiñ, shah kheiñ poh, naba ki sngew bym kim kot bor ha ki jingnang jingtip kum kiwei pat ki para khynnah skul, nangta kiba donkam ka jingtei ban pynleit jingmut bad kumjuh kiba sngew ba kane ka jingduna ha ka bor pyrkhat kadei ka jingpang kumta ka Mental Health Foundation (MHF) ka la pynlong ïa ki jingleit ïasyllok sha ki skul bapher bapher ha kine ki 2 snem ba dang ïaid naduh u snem 2024 ban ïarap ïa ki khynnah skul, ki kmie ki kpa bad kumjuh ruh ki nonghikai ba kin lah ban shim ïa ki sienjam ban ïatreilang, ban sngewthuh markylliang khnang ban tei ïa ka bha ka miat jong ki khynnah skul.
Haba kren sha ki lad pathai khubor u Dr. Sanjay Kumar General Secretary ka Mental Health Foundation bad ka Meeta Mishra kaba ïalam ïa ka project ka Mind Activation Through Education (MATE) ki la ïathuh ba lyngba ki prokram bapher bapher ki la lah ban ïarap ïa kiba bun ki skul ha Meghalaya.
Kila ïathuh ba hapoh ki prokram jong ka MATE ki la lah ban leit ïasyllok haduh 5000 ngut tam ki khynnah ha ki 25 tylli ki school jong ki 8 tylli ki District jong ka Khasi, Jaiñtia, bad Garo, nangta palat 3000 ngut ki nonghikai bad ki kmie ki kpa da kaba ki la sam ïa ki jinghikai jingpynsngewthuh hapdeng jong ki bad la pynlong ruh kumba 6 tylli ki Development Community Awareness Programme lyngba ki workshop.
La ïathuh ba lyngba ki jingwad bniah bad jingïasyllok ka la pyni ïa ka jingkiew bha ki khynnah skul ban pynleit jingmut da ka jingïasyllok bad sngap bha ïa ki jingshem jingsngewkhia jong ki, ban sngew shaniah bad ka bha ka miat ha ka bor jingsngew bad ban shimbynta shit rhem da ka jingpynleit jingmut ha ka pule puthi.
Ka MATE Project kadei kaba la bei pisa hapoh ka CSR initiative jong ka Oil India Limited bad kaba la kyrshan lyngba ka EMPOWER ka Sorkar Meghalaya bad ka jingïarap ki riewshemphang ka All India Institute of Medical Health Science (AIIMS).
Ïa kine ki program la pyntyllun hapoh ka jingpeit u Ranjit Rath, CMD, OIL India Limited, u Arun Jyoti Baruah, CGM, OIL India Limited
bad jingkhmih bniah jong u Dr. Nand Kumar bad Dr. Rajesh Sagar na ka All India Institute of Medical Sciences. Ïa kane ka jingleit pynsngewthuh halor ka projek MATE na ka liang ki kmie ki kpa ki la pynpaw ka jingiaroh halor ka jingwan ai jingpynsngewthuh jong ka MHF kaba la ïarap ïa ki khun jong ki ban sngewthuh ïa ki jingeh ba ki mad ha ka pule puthi bad kumno ba kin ïakhun ïa ki jingshah ban beiñ bad shah kren beiñ halor ka jingduna ha ka pule puthi jong ki.
