Ha ki 7-8 snem ka Ranikor constituency kala sdang kylla dur ha ka roi ka par: Pius Marwein

Shillong, Jymmang 17: U MLA bad MDC jong ka Ranikor Constituency u Bah Pius Marwein u la pynpaw ba ha kine ki 7 bad 8 snem kiba la leit ki kam pynroi hapoh ka Constituency kila sdang ban paw bad kharoi bha ha man la ki dong ki thain namar ka jingïatrei lang hapdeng u nongmih khmat bad ki paidbah jong ka dong ka thain hi baroh kawei.
Ïa kane u Bah Pius u la pynpaw ha ka jingialang kaba la long ha Khasi National Dorbar Hall, ha ka jingialang jong ka General Meeting, ka United Democratic Party (UDP) Shillong Area Unit kaba la long ha ka janmiet jong ka 16 tarik u Jymmang.
Ha kane ka janmiet u Bah Pius u la sam ruh ïa ka MLA scheme jong u snem 2024-25 sha ki nongioh bynta kiba dei ki nongshong shnong ka Ranikor Constituency kiba shong basah ha nongbah Shillong.
Ha katei ka janmiet ba sam scheme u Bah Pius la wan ban sakhi lang da ki nongialam jong ka UDP Shillong Unit kiba kynthup ïa u Bah Bahun S Sanglyne, u Bah Blossding Wanniang, u Bah Comeback Wanniang, u Bah Albert Marwein nalor kiwei pat.
Haba kren ha ka jingialang u Bah Pius u la pynpaw ka jingkmen ba khraw ba u la ioh ka lad ban kynduh bad ki paid jong ka constiyuency kiba shong basah ha nongbah Shillong, khlem da khein la ki dei na kano kano ka party hynrei nga shim beit ba kidei ki paid nong shong shnong ka Ranikor Constituency.
Ha kajuh ka por u la ai ka jingiaroh ia ki nongialam bad ki dkhot jong ka UDP Shillong Unit haba don kino kino ki jingjia la kadei ka sngewbha ne sngewsih, ki nongialam ki shim ia ka bynta ba khraw ban iarap ia kito ki long iing kiba mad ne kynduh jingeh.
Haba kren halor ki kam pynroi, u Bah Pius u la ong ba ki paidbah nongshong shnong kiba dei ki nongrep ynda la poi ka por ba kin die ïa ki mar rep jong ki la hap ban shu die tad dor hynrei mynta ym don shuh ki shnong kiba dang hap ban iaid kjat.
“Ngi iohi ba hapoh ka Ranikor jong ngi, haba ngi phai ha baroh ki liang ka roi ka par, ka Ranikor Constituency ha kaba kut ong u 2028 kan dei ka Constituency kaba la shai kum kiwei pat ki constituency bad kane kadei ka thong ba ha khmat eh jong nga” ong u Bah Pius.
Shuh shuh u Bah Pius u la ong, nalor ki kam pynroi hapoh ka constituency kiba u la theh ba baroh ki zone ne ki kyntoit shnong jong ka Constituency, u la phai ruh sha ki scheme ki ban pynioh jingmyntoi ïa ki paidbah nongshong shnong bad ki nongkyrshan.
U la kyntu ruh ïa ki paidbah ba kin long kiba ïai shah khamtam eh kito kiba ym shym pat la ioh ka scheme ba kim dei ban duh mynsiem ne duh jingkyrmen hynrei kidei ban long kiba ïai shah namar ba ka por bad ka pali jong ki kan sa poi.
Ha kane kajuh hi ka janmiet u Bah Pius u la pyllait paidbah ruh ïa ka jyrsey ialehkai football na ka bynta ki khun samla jong ka Constituency kiba shong basah ha Shillong ba kin pyndonkam haba ki leit ban ia shim bynta ha kino kino ki jingiakop.