Shillong, Jymmang 17: Hadien katto katne taïew jong ka jingïalehkai kaba itynnad bad ka jingïashim bynta shitrhem jong ki samla lyngba ka basketball ka sienjam kaba ar (2nd) jong ka lympung DUBAKH Scholastic Basketball League 2026 ka la poi sha kaba kut, ha kaba ki rangïalehkai ka Shillong Commerce College bad ki thei ïalehkai jong ka St. Mary’s Higher Secondary School ki la rah ïa ka nam lahduh.
Kane ka lympung ba la pynïaid da ka DUBAKH Sports Pvt Ltd ha Pearly Dew School Basketball Court, Jaiaw Laitdom, Shillong, ka la sakhi ïa ka jingïashim bynta naki 16 tylli ki skul bad ki kolej bad palat 190 ngut ki samla pule na kylleng ka jylla Meghalaya da ka jingthmu ban kyntiew ïa ka Basketball ha kajuh ka por ban phriang ïa ka jingpynsngewthuh pyrshah ïa ka jingdih drok bad jingdih buaid hapdeng ki samla.
Ïa kane ka lympung la pynlong ryngkat ka jingïatreilang bad ka DREAM Meghalaya, kaba hap hapoh ka tnat Social Welfare, ka Sorkar Meghalaya, ryngkat ka jingkyrshan na ka U Matter, Vector X, bad DB Fast Food.
Ha ka phainal jong ki kynthei, ka St. Mary’s HSS ka la wanrah ïa ka jingïalehkai kaba pyrkhing bad ka jingïatreilang kaba khlaiñ ha baroh kawei ka jingïakhun ban pynliem noh ïa ka Mylliem Presbyterian Higher Secondary School da 36–16.
Katba ha ka phainal jong ki shynrang, ka jingïakhun ka la long kaba ïakhaid bha, ha kaba ka Shillong Commerce College ka la jop da ka said da tang 38-37 ïa ka Thomas Jones Synod College, Jowai.
Baroh ar tylli ki kynhun lahduh (shynrang bad kynthei) ki la ïohpdiang ïa ka khusnam pisa kaba long 10,000, katba kiba wan ba-ar ki la ïoh 5,000** ryngkat bad ki trophy bad takma.
