Shillong, Jymmang 17: Ka Meghalaya ka la bteng ïa ka jingjop kaba paka sha ka saw sien lynter ha ka lympung phutbol jong ka Swami Vivekananda U-20 Men’s National Football Championship 2026 hadien ba ka la pynliem noh da 3-0 kol ïa ka Rajasthan hynne ka sngi. Baroh lai tylli ki kol ki la wan ha ka kylla step.
Ka jingjop ka mut ba ka Meghalaya ka bat ïa ka kyrdan ba ha khlieh duh ha ka Group A da kaba kamai pura 12 point bad ka la pynskhem ïa ka jaka ha ka QuarterFinal ha Narainpur, Chhattisgarh.
Kane ka jingïakhun ka la dang step ha ka por 7:30 baje, bad ka Meghalaya ka la ïoh ban lamkhmat kham kloi hadien ba u Mebanlamlynti Masharing (3’) u la ïoh ban thep ïa ka bol na ka corner kick jong u Imeral Jana.
Ka kynhun ka la nang pynjlan shuh ïa ka kol lamkhmat lyngba u Ryan Gibbs Kharnaior ha ka minit kaba 17. Shuwa ban jam sha ka por shongthait u Phermanbha Lyngdoh (38′) u la pynkhih ïa ka kol kaba lai ban pynskhem ïa ka jingkyrmen jong ka Meghalaya ban khur ïa ka jingjop watla ka por ka dang bun ban ïalehkai.
Kham hashwa kane ka jingïalehkai, ka Meghalaya ka la lah ban pynliem ïa ka Bihar da 3-1 kol ha ka 09 tarik Jymmang, ïa ka Jharkhand da 5-0 kol ha ka 11 tarik Jymmang bad ïa ka Andhra Pradesh da 8-1 kol ha ka 13 tarik Jymmang.
Kumta ka Meghalaya kan pynkhreh ban aireng pyrshah ïa ka kynhun ba jop na ka Group C ha ka Quarterfinal.
