Jowai, Jymmang 17: Ka Khimusniang kala long ka lahduh haka lympung ïalehkai phutbol bala ai kyrteng ka 1st Wailadmiki Shylla Veterans Football Tournament 2026, kaba la pynlong mynta ka sngi Saitjaiñ ha madan Jrisaleiñ Chutwakhu Jowai.
Kane ka jingjop ka Khimusniang kala wan hadien bala pynliem ïaka Mukhla da 2-0 kol, katba ka Mission Compound/Lumkyrwiang kala jop ïaka kyrdan ba lai (3rd Place) bad baroh ki kynhun kiba wan ïashim bynta ki don haduh 18 tylli.
Ïa ki khusnam sha ki nongjop la sam da u kongsan jong kane ka sngi u bah Hamletson Dohling uab dei u Adviser jong u Chief Minister bad u President ka Meghalaya Football Association (MFA), ha ka jingdonlang u MLA ka Jowai uba dei u myntri ka koit ka khiah bad ka kam ïalehkai Sports ma Wailadmiki Shylla, ki MDC ka JHADC, ki nongkitkam ka NPP, ki nongïalam shnong bad kiwei de.
Na ka bynta ka kynhun kaba ïoh rah ïa ka nam lahduh kala ïoh roh ïaka song pisa kaba 1,50,000/- tyngka, ba wan ba ar 1,00,000/- tyngkat, katba kaba wan ba lai kala ïoh 50,000/- tyngka ha ryngkat ki Medal bad Trophy. Ha ka jingïalehkai Paralok ka Legend XI kala jop ïa ka Kdup dei maia XI.
Na ka liang u bah Hamletson Dohling haba ai jingkren ula ai ka jingïaroh ïa u MLA ka Jowai uba la pynlong ïa kum kane ka jingïalehkai phubol, da kaba pynsngew ba u MLA ka Jowai u long uba stad bad uba shemphang kum u myntri ula nang kiew bha haka jinglong nongïalam.
Ula kyntu ïa ki nongïalehkai phutbol ba kin bteng ïa ka jingïalehkai na ka bynta ban ïoh ïaka koit ka khiah, ula pyntip ba ka Ri-Lum Jaiñtia kala pynmih bun eh ki rang ïalehkai kiba paw hapoh ka jylla, Kum u President ka MFA ula ong ka Association kan ïaleh katba lah ban pynkiew ïa ka jingïalehkai Sports hapoh ka jylla.
Katba u ma Wailadmiki Shylla ula ong ka jingangnud jong u ban pynlong ïa kane ka lympung ha Madan Jrisaleiñ ka long ban pynim biang ïa kane ka madan bad ban pynbha pynmiat ïa ka da kaba shna ïa ki Gallery sawdong jong ka, namar kane ka madan kala pynmih shibun ki nongïalehkai.
Ïa kane ka lympung la pynïaid da ka ophis jong ka NPP Jowai Block bad ïa ka jingpynlut pynsep la synñiang da ki nongtrei ka Party.
Ïa ka nam Best Goalkeeper la ïoh da u Rimiki Lyngdoh naka Mission Compound/Lumkyrwiang, Top Scorer la ïoh da u Charles Sumer na ka Mukhla, Player of the Tournament da u Donbok Bamon na ka Khimusniang, Oldest Player la ïoh da u Carmel Suchiang (63 snem) na ka Mukhla.
