Pyndep shah hikai ki 85 ngut ki samla ki ban ïohrung ha ka kam LDA hapoh Secretariat

Shillong, Jymmang 16: Ka jinghikai ïa ki samla kiba la ïoh rung ha ka kam Lower Division Assistants (LDA) hapoh ka Secretariat Administration Department, ka sorkar jylla, kaba la long ar taïew lynter la pynkut noh ha kine ki sngi ha kaba 85 ngut kiba la shah hikai kyrpang shuwa ban kin sdang trei ïa ka kam, ïa kane ka jinghikai la pynlong ha Meghalaya Administrative Training Institute (MATI), Mawdiangdiang.
Ïa katei ka prokram, la buh dak ïa ka jinglah ban pyndep ïa ka training ba jop kaba la pyndep ha ki ar tylli ki kynhun naduh ka 15 tarik Ïaïong haduh 12 tarik Jymmang 2026, ha kaba kane ka training ka la thmu ha ka ban pynbiang ha ka jingpynrung kam thymmai ïa ki nongtrei kiba lah biang ka kyrdan pule jong ki, ka jingtbit bad ka kam ba ki dei ban trei ha ki ophis treikam jong ka sorkar.
Ïa katei ka prokram, la pynïaid da u Bah Sosthenes Sohtun, uba dei u myntri ba dei peit jong ka Secretariat Administration Department, Govt. of Meghalaya kum u kongsan.
U la ong ba kum kane ka training prokram, ka ai ïa ka nongrim ba skhem na ka bynta kiba ïohkam thymmai bad ka long ka bynta ba kongsan ban pynkhreh lypa ïa ki ha kaba kin shimkhia ïa ka kam ba ki trei ha ki ophis treikam ka sorkar.
U la ban jur halor ka jingdonkam jong ka jinglong ba beit, jinglong hok, ka jingkitkhlieh, ka jingtbit bad ka jing minot ha ka kam ba ki trei na ka bynta u paidbah, katba u la pynkynmaw ïa kine ki nongïashim bynta bad ki kam LDA ki long ki bynta ba kongsan ha ka ban pynthikna ïa ka jingtreikam ba ïaid beit ïaid ryntih jong ka Secretariat bad ka jingïarap ban ai sha ki paidbah.
Utei u Myntri u la ong ba ka jingsynshar bad ka jingïatreilang ki paidbah mynta ka la kylla long kum ka teknologi, kaba pynlong ïa ki nongtrei sorkar ba kin bteng ban nang, pynïabiang bad pynkiew ïa ka rukom treikam jong ki da ka jingtbit bad har rukom.
U la ïaroh ïa ka jingkynthup lang ïa ka jinghikai halor ka jingpyndonkam ïa ki lad digital Artificial Intelligence kum ka Chat GPT bad Perplexity, da kaba ong ba kum kine ki digital kan kyrshan ban nang pyntbit shuh shuh ïalade, ka jingthymmai bad kan don ka jinglah pynpoi ïa ki tiar online na ka bynta ki paidbah ka jylla Meghalaya.
U la pynshlur ïa ki nongïashim bynta ba kin lah ban pynneh ïa ka jingkular jong ki ha ka ban nang pyntbit shuh shuh ïalade bad u la ai khublei na ka bynta ka jingtrei ba jop bad ka don jingmut ha ka jingshakri paidbah.
U Swapnil Tembe, uba dei u Director ka Meghalaya Administrative Training Institute (MATI), ha ka jingkren jong u, u la ong ba ka jingdonkam jong katei ka training ka long ban pynlong ïa ki nongtrei ba kin shim khia ïa ka kam bad kin long ki nongshakri paidbah batbit.
U la ong ba ki LDA ki long ki shyieng budlum jong ka ophis Meghalaya Secretariat bad ban jur ïa ka jingdon kam jong ka jingïabeit lang, ka jingbiang ha ka por, ka jingshim khia bad ka akor ha ka kam ba ki trei.
U la ïathuh ruh shaphang ka jingithuh ïa ka Mission Karmayogi bad ki jingnang ban sdang ban pyntbit hi ïalade lyngba ki rynsan kum ka iGOT, ha kaba u la pyn shlur ïa ki nongïashim bynta ba kin nang bteng pyntbit shuh shuh ïalade bad ba kin pynkhreh ïalade na ka bynta ka lawei ha ka ban sa wan ki jingkylla ha ka rukom treikam.
U la pynkynmaw ba shadien jong ka file ba pura bad ka rukom synshar ka don ka jingïathuh khana shaphang jong u briew, kaba la pynlong ïa ka akor trei, ka jingsngewthuh bad ka jingkdup ban noh synniang sha ka liang ka bit ka biang u paidbah ka long ka nongrim ba kongsan ha kaba uwei pa uwei u nongtrei sorkar u dei ban don.
Ha katei ka prokram, la donlang ka Dr. Twinkle S. R. Marak, MCS, Joint Director, MATI kiba la ai jingkren da kaba ai khublei, lem bad ki nongtrei bad ki dkhot jong ki nonghikai jong ka MATI nalor kiwei kiwei pat.