Shillong Jymmang 16: Ka khubor ba la ïoh na ki pulit la ïathuh ba u Subrajit Das u la phah ka jingujor ba ha ka 13 tarik mynta u bnai ha ka por kumba 1 baje mynstep, ki runar bym lah ban ithuh ki la tuh ïa ka scooter jong u kaba don u nombar ML-04C-9874 na Polo, Shillong.
Shuh shuh ha ka step jong ka 14 tarik mynta u bnai kawei ka longkmie ka la phah ka jingujor ba ki runar bym lah ban ithuh ki la tuh haduh 10 byrni u rnga napoh ka dukan jong ka kaba don ha Laitumkhrah, Shillong.
Nangta ki pulit ki la ïathuh ba u Debabrata Mazumdar uba na Babupara, Tura (WGH) u la phah ka jingujor ba ha ka 13 tarik mynta u bnai ha ka por kumba 4 baje janmiet, u la shem ba ki la don ki runar kiba la tuh ïa kawei ka LPG cylinder bad ka pisa kumba T. 400/- (approx).
