Pyndem sa ka Dalmia Cement ha ka JAC bad la weng ïa ka jingiakhih pyrshah Dalmia & Dang

Khliehriat, jymmang 15: Halor ka jingiakhih ka Joint Action Committee, kaba kynthup ka East Jaiñtia Hills Truck Owner & Driver Association bad ka Jaiñtia Hills Truck Owners’ Association, kaba lah neh mynta lah shibnai pura, pyrshah ïa ka Dalmia Cement, East Jaiñtia Hills, da kaba bat bad pynphai kylla ïa baroh ki trok jong ka halor ka jingbym kheiñ snep ïa ki mat jingdawa jong ka JAC, ka Dalmia Cement myn ha ka 12 tarik mynta u bnai, ka la khot iakren ïa ka JAC, ha Guwahati bad ha katei ka jingiakynduh, ka Dalmia Cement ka la hap ban pyndem ha ka JAC da ka ba pynioh ïa ki ïa ki mat jingdawa jong ka JAC.
Ki mat ba la dawa da ka JAC ki long ban ai trip kit cement ïa ki trok jong ka JAC, sha ki thaiñ Barak Valley, Assam 14 tylli ha ka shisngi – 7 trok ïa ka EJHTOTA bad sa 7 trok pat ïa ka JHTOA ha ka juh ka por ruh, da kaba kular ba ka jingkit bad jingpynhap dewbilat ki trok kan long kaba sted naduh ka jaka thep haduh ka jaka pynhap, khlem da don shuh kano kano ka jingpyn ap slem shuh ïa ki.
Shuh shuh, ka company Dalmia Cement, ka la kular ruh ban pynkiew ïa ka dor bai kit kat kum ka jingdaw jong ka JAC, kata na kaba rim T.925/- shiton sha kaba thymmai kata, T. 975/- shiton.
Kumta, halor kane ka jingpyndem ka Dalmia Cement, ka JAC ha ka jingialang jong ka, ba la pynlong my ha ka 13 tarik ka la rai ban weng noh ïa ka jingiakhih jong ka pyrshah ïa ka Dalmia Cement.
Halor ka jingiakhih jong ka JAC pyrshah ïa ki bulker truck kaba la ïaid mynta shibnai pura, da kaba mana ïa ki ba kim dei ban dang kit cement shuh na ki karkhana cement kiba don ha East Jaiñtia Hills, u Deputy Commissioner, ka East Jaiñtia Hills District, u Manish Kumar, ha ryngkat ka jingiadonlang u Superintendent of Police ka district, u Pankaj Kumar Rasgania, kynthup bad kiwei pat ki heh officer, u la khot jingialang kyrkieh ïa ka JAC bad ïa ki nongpyniaid jong kitei ki bulker trok, kiba kynthup u Devendar Bansal, u Residential Director, ka Star Cement bad kiwei kiwei de, ha ka kamra treikam jong u, ha Khliehriat. Hynrei, katei ka jingialang, kam shym la poi sha ei sha ei ruh em, namar ba, ka JAC ka iengskhem beit triang ha la ka jong ka nongrim, ba dei ban pynduh pyndam beit noh shisyndon ïa baroh ki bulker trok kiba kit dewbilat da ki bulker trok namar ba kane ka ktah ïa ka ioh kam ioh jam bad ka jakpoh jong ki trai trok kiba dei ki trai ri trai muluk, kumta, namar ba katei ka jingialang ka khlem sei soh ei ei ruh em, u Deputy Commissioner, u la pynwai noh ïa ka, da kaba kyntu ïa kitei ki arliang mamla- ka JAC bad ki nongpyniaid bulker trok ban pyrshang ban iapynbeit noh ïa kane ka jingeh jong ki hapoh shitaiew bad ban wanrah pat ïa kaei kaba mih na katei ka jingiapynbeit jong ki ha ka jinglang kaba un sa khot biang ha kane taiew ban wan.
Ha ka juh ka por ruh, naka liang pat jong ka JAC, marsyn wai katei ka jingialang ha ophis treikam u Deputy Commissioner, sa shisien, na ka bynta ka hok bad ka jakpoh jong ki trai ri trai muluk khamtam ki trai trok, ka la rai ba ka jingiakhih jong ka pyrshah ïa kitei ki bulker trok kan long kaba khlem buh por, kan dang iai bteng beit sha khmat, na bynta kane, ka JAC ka kyrpad biang sha shisien ïa ki paidbah khamtam ki khun ka Ri Jaiñtia bad ki kynhun seng bhalang, ba kin sngewbha ban dang iai bteng ban ai jingkyrshan ïa JAC kumba ki la ai la baroh shi katta, khnang ba kane ka jingiakih jong ka, kan long kaba jop na ka bynta ka daw bah bad ka jingeh rngiew jong ka jaitbynriew rit pait jong ngi, kane ka long katkum u kyrwoh ba la phah da u Chairman JAC u bah Biangshwa Shylla bad u Secretary JAC, u bah Kyrshan Dkhar.