Shillong, Jymmang 15 : Ka bynta ba nyngkong kaba ïadei bad ka Khanasamari 2027 ha Meghalaya kan sdang naduh mynta ka sngi, ka 16 tarik u Jymmang 2026, da kaba sdang ïa ka jinglum jingtip na ki iing ha kylleng ka jylla. Kane ka kam ka ban long baroh shi bnai kan bteng haduh ka 14 tarik Jylliew, 2026, kaba kynthup ïa baroh 12 tylli ki district jong ka jylla Meghalaya lyngba ka rukom lum jingtip da ki kor digital.
Ha ka jingïakren bad ki lad pathai khubor hynne ka sngi ha Shillong Press Club da ka Press Information Bureau, Shillong ha ka jingïatreilang bad ka Tnad Census Operations, Meghalaya ki la pyntip halor ka rukom treikam, ki lad pynkhreh, ka rukom treikam digital, bad ka jingïaid shaphrang jong ki kam ai jingkhein hi dalade kiba dang ïaid shakhmat. Ha kane ka jingïalang bad ki nongthoh khubor la ai jingkren da u Biswajit Pegu uba dei u Director ka Census Operations, Meghalaya, Sorkar India. Kiwei pat ki heh ophisar kiba la don lang ki kynthup ïa u Subhashish Chatterjee, Joint Director; u B. Basumatary, Deputy Director; bad Bah Aibor Sanglyne, Deputy Director from the Tnad Census Operations, Meghalaya. Ïa kane ka prokram la pynïaid da u Gopajit Das, Assistant Director, PIB Shillong.
Haba ai jingkren sha ki lad pathai khubor, u Biswajit Pegu u la pyntip ba la thung haduh 8,309 ngut ki Nongshim jingkhein (Enumerator bad Supervisor) ha kylleng ka jylla Meghalaya na ka bynta ban pynlong ïa ka jinglum jingtip na ki iing. Baroh ki don 9,950 tylli ki House Listing Block (HLB) kiba la pyndep ha kylleng ka jylla na ka bynta ki kam ba ïadei bad ka Khana samari 2027.
U la ong ba ka bynta jong ka jinglum jingtip na ki iing kalong ka nongrim jong ka kam khanasamari baroh kawei bad yn lum ïa ki jingtip kiba ïadei bad ka jinglong jingman jong ki ïing, ki tyllong um dih, ki kam pynkhuid, ki jingdonkam ha ïing, bad ki jingdon jingem. Ki nongshim jingkhein kin leit jngoh ïa man la ka iing bad ka longiing ha ka kam kaba 30 sngi ban pynthikna ïa ka jingkhein kaba pura bad kaba thikna.
U Pegu u la pyntip shuh shuh ba ïa ka Khanasamari 2027 la pynlong lyngba ka rukom treikam digital. Ki nongshim jingkhein kin lum bad phah ïa ki jingtip beit beit lyngba ka Mobile Application da kaba pyndonkam ïa ki smartphone jong ki hapoh ka kam “Bring Your Own Device” (BYOD). La khmih lynti ba ka rukom treikam digital kan kyntiew ïa ka jinglong thikna jong ki jingtip, pynduna ïa ki jingbakla, bad plie lad ban peit bniah ha ka por ïa ki kam.
Ka Tnad ka la pyntip ruh ba ka jylla Meghalaya ka la lah ban pyndep 100 percent ïa ka Geo-tagging bad ka jingpynbeit pud ïa baroh ki House Listing Block ha baroh kawei ka jylla ha ka por ba dang pynkhreh. Ka kam ka kynthup ïa baroh 12 tylli ki distrik, 7428 tylli ki shnong, bad 9 tylli ki shnong, kaba pynthikna ïa ka jingpynkhreh kaba pura na ka bynta ban sdang ïa ki kam. Katba ka East Khasi Hills ka la don bun eh ki HLB haduh 2,159, bud sa ka West Garo Hills kaba don 1,488.
Halor ka rukom ai jingkheiñ hi dalade, ki heh ophisar ki la pyntip ba ka bynta jong ka jingai jingkheiñ hi dalade lyngba ka lad online, kaba la sdang naduh ka 1 tarik u Jymmang, 2026, kan kut noh ha ka por shiteng miet mynta ka sngi. Ki nongshong shnong ki la lah ban pynpoi ïa ki jingtip ba bniah jong ki ïing ki sem jong ki lyngba ka lad digital ha rynsan Self-Enumeration. Ki heh ophisar ki la ong ba ka Meghalaya ka la sakhi ïa ka jingpynshlur ïa ki paidbah ban ïashim bynta ha kane ka kam, ha kaba ka West Khasi Hills kadei ka jylla kaba bun tam ki nongai jingkhein hi dalade, bud sa ka East Khasi Hills bad ka West Garo Hills.
U Pegu u la pynshai ba ïa ki jingtip ba la ai lyngba ka rynsan Self-Enumeration yn pynshisha da ki Nongshim jingkheiñ ha ka por ba ki leit sha man la ki ïing, bad tang ïa ki jingtip ba la pynshisha yn upload lyngba ka HLO application.
Ki ophisar ki la pyntip shuh shuh ba la ai jinghikai ïa ki Nongshim jingkhein bad ki Nongpeit kam halor ki jingmut jong ka khanasamari, ki rukom treikam, bad ka jingpyndonkam ïa ki digital application na ka bynta ban lum jingtip kaba thikna. Ha ki sngi ba nyngkong jong ka jingtreikam, ki nongshim jingkhein kin pynshisha ia ki pud jong ki House Listing Block, ban ithuh ïa ki jaka, ban pynkhreh ïa ki map bad ban ai nombar ïa ki iing shwa ban sdang ban lum jingtip ïa ki iing.
Ka Tnad ka la ban jur ba la buh ïa ka rukom pynthikna kaba khlain, kynthup ïa ka jingpeit bniah ha ka por, ki jingjurip ïa ki jaka, bad ka jingpynshisha biang ha kano kano ka jaka kaba donkam. La pyntreikam ruh ïa ki lad ban lum jingtip offline ha ki jaka ba duna ka network.
Haba kyntu ïa ki nongshong shnong ban ïatreilang bad ki nongtrei ha ka khanasamari, u Pegu u la ong ba ka jingïashim bynta jong ki paidbah ka long kaba donkam bha ban pynthikna ïa ka khana samari kaba thikna bad kaba kynthup lang ïa baroh ka ban kyrshan ïa ka jingthmu ha ki por ban wan, ka jingai jingïarap bad ki sienjam ba ïadei bad ka roi ka par ha kylleng ka jylla.
