Nongstoiñ, Jymmang 15: Kum shibynta ban pynsngewthuh paidbah halor ka POCSO Act 2012, NDPS Act, NALSA Scheme 2015 bad Juvenille Justice (Care and protection of Children) Act 2015, ka ophis jong ka District Legal Services Authority (DLSA), West Khasi Hills District Nongstoiñ, ha ka sngi thohdieng ka la pynlong ïa ka Awareness Prokram ha ïing Dorbar hall jong ka shnong Ksehkohmoit ha Eastern West Khasi Hills District.
Ha kane ka Prokram la wan ban ai ka jingpynshai paidbah da ki riew shemphang kiba kynthup ïa ka kong E.Myrthong ALADC, ka kong L.Nongrem LAC, u bah B.Kurbah Protection Officer ka Ophis DCPU, u bah E.Mairom na ka Ophis DSEO ha ryngkat ka jingdonlang u Sordar shnong lem bad ki paidbah nongshong shnong.
Ka kong E.Myrthong haba ai jingkren ha ka jingïalang, ka la ong ba ka jingthmu jong kane ka prokram ka long ban batai pynsngewthuh ïa ki paidbah nongshong shnong, halor ki kyndon aiñ bad ki hok jong ki paidbah bad ruh ïa ki lad jingïarap ba shu ioh ei na ka bynta ki longïing ba duk ha kaba ïa dei bad ka jingdonkam jong ki lada ki ngat ha kano kano ka apot jong ka jingshah ban beiñ ne jingshah thombor.
Shuh shuh, la ïoh ruh ïa ka jingkren na ka kong L.Nongrem kaba la ai ka jingpynshai ha kaba ïadei bad ka aiñ POCSO Act. Katba na ka liang u bah B.Kurbah u la ai ka jingpynshai halor ka ka hok jong ki khunlung khynnah kaba long kaba donkam bha bad ruh halor ki lad jingïarap na ka sorkar. La ioh ruh ka jingkren na ka liang u Sordar shnong bad na ka Ophis u DSEO.
