SHILLONG, Jymmang 14: Ka Shillong Lajong FC kan pynkhreh ïa ka jingïalehkai ba khatduh hala ïing jong ka lympung Indian Football League mynta ka samoi 2025-26 pyrshah ïa ka Rajasthan United FC ha kane ka sngi Thohdieng ha ka por 6:30 baje janmiet ha madan First Ground-SSA Stadium, Polo.
Ka Lajong kan jam sha kane ka jingïakhun kaba kongsan hadien ka jingïakhaid kaba mar 1-1 kol bad ka Sreenidi Deccan FC shabar nala ïing ha ka jingïalehkai ba ladep, bad kan kyrmen ban khur ïa ka jingjop hakhmat ka jingkyrshan jong u paidbah.
Haba kren shuwa ban jam sha kane ka jingïakhun, u Head Coach ka Lajong u Birendra Thapa u la pynpaw ïa ka jingsngew skhem hala ka jong ka kynhun da kaba ong, “Ngi sngew skhem bad pynleit jingmut bha ban ïoh ïa ka jingmih kaba bha lashai ka sngi. Ka dang don ka lad ha kaba ïadei bad ka jingkheiñ na ka bynta jong ngi, hynrei ka jingpyrkhat jong ngi ka sah kumjuh ban shim ka kawei ka jingïalehkai hadien kawei ka pat.”
U la ban jur ruh ïa ka jingdonkam ban burom ïa ki liang pyrshah. “Ka Rajasthan United ka lah ban nym don jingmyntoi na kane ka jingïalehkai katkum ka kyrdan (ha ka miej), hynrei ka dei ka liang pyrshah kaba khlaiñ. Ngim lah ban kheiñ sting ïa ki.”
Mynta ka Lajong ka don ha ka kyrdan kaba 2 ha ka miej da kaba kamai 22 poiñ na ki 12 tylli ki jingïakhun, bad ka kynhun ka dang don ha ka jingïakhun ban ïaknieh ïa ka nam lahduh da kaba sah sa tang ar tylli ki jingïalehkai ha kane ka samoi.
Ka jingjop na ka bynta ka Lajong kan pynjur ïa ka jingïaknieh nam lahduh, khamtam ha shuwa ka jingïakhun jong ka Diamond Harbor FC pyrshah ïa ka Dempo SC, ki ban aireng ha kane ka sngi U Blei, kaba lah ban wanrah jingkylla shuh shuh ïa ki kyrdan.
ïa tiket na ka bynta kane ka jingïakhun hapdeng ka Lajong pyrshah ïa ka Rajasthan lah ban ïoh na The Electronic Centre (Khyndailad), Cafe Shillong (Laitumkhrah) & Ka jaka die tiket ha SSA Stadium (Polo). Ïa kane ka jingïakhun yn sa pyni live ruh ha ka Sony Sports Network, ka DD Sports bad ka OTT platform Sony Liv bad Waves.
