Poi lak ka bai bording ha ka thaiñ Mawsynram, hap die jaka ban siew sha ka SAI Computer Ltd

Shillong, Jymmang 11: Ka Synjuk ki Nongsynshar shnong, nangta ki sengbhalang ba kynthup ïa ka HYC, HNYF bad FKJGP ki la leit ban rah syndon da ki placard hakhmat ka ïing sah jong u Myntri ka Tnat Sam Bording ka Sorkar jylla u Bah Metbah Lyngdoh ban pynpaw ïa ka jingpyrshah ïa ka jingaiti ka Sorkar ha ka SAI Computer Ltd ban pynïaid ïa ka jingsam bording ha ka thaiñ Mawsynram Sub Divisions kaba kynthup ruh ïa ki 3 tylli ki C&RD Block halor ka jingpynkiew bai bording shaba palat.
Hadien ba ki la leit rah placard, u Myntri ka Tnat Bording u la khot ban ïakren bad ki ha kamra treikam jong u ha Secretariat bad na u ruh kine ki nongshong shnong ki la buh por 2 taïew ba ka Sorkar kadei ban pyndam noh ka jingtreikam ka SAI Computer Ltd ha ka thaiñ.
Haba kren sha ki lad pathai khubor na ka liang u Myntri ka Shnong Thlongpleng u Bah Donboklang Kharlyngdoh, Nangta u Chairman ka Synjuk nongsynshar shnong u Bah Tyngshain Ronsang, ka Kong Jean Lamare, Bah J Kharbani bad u Adviser ka Synjuk ki Sengbhalang u Bah Kyllang Thongni ki la ïathuh ba naduh ba shimti kane ka company ka bording kum ha Resort kaba ju poi 5 hajar mynta ka poi da ki lak.
Ki la ïathuh ruh ba ki don ki longïing ba hap die noh ïa ki jaka tang ban siew bai bording, ki ïathuh ruh ki dukan sha ba ju poi 5 spah mynta ka kiew sha ka 25 hajar, dukan shna mobile na ka 5 spah sha ka 9 hajar, nalor kiwei kiwei bad kumba ka long kumne ka pyni ba ha Mawsynram Sub Divisions ym don ïing baduk shuh ne ki longïing BPL.
Ki la ïathuh ruh ba kane ka company ka la wanleh survey sha ki thliew ïing lyngba ka Vigilance committee ha ryngkat ki pulit ban dain kuna, ban pyntieng ïa ki longïing kiba kumba 90% kidei kiba duk ha kaba kane ka la ïaid mynta la 6 bnai naduh ba aiti ka Sorkar sha ka SAI Computer Ltd kaba la shimti na ka FEDCO Ltd ha ka 1 tarik u Naiwieng, 2025, kumta ki la dawa na ka Sorkar ban scrap noh ïa kane ka jingïatehkular bad ka SAI bad la don ruh u Rangbah Shnong uba la shah byrngem ha ki pulit kiba la kynnoh ba u pynthut ïa ki kam ka company.
Ki la kynnoh ruh ba ka company ka la wan leh don bor ïa ki longïing khlem da pyntip ïa ki nongsynshar shnong kumta ki la kyntu ïa ki paidbah ka thaiñ naduh Mawphlang, Mawsynram bad haduh Ranikor ba kim dei shuh ban siew Bill light katba ka Sorkar kam pat pyndam ka jingtreikam kane ka company.