Shillong, Jymmang 12 : Ka Langsning FC ka la pynkut ïa ka jaka ba khatduh ban pyntikna ïalade ban ïoh ha ka Top 8 jong ka MeghalayA State League da kaba pynliem ïa ka Lumphyrnai Sohphoh FC da 5-0 kol ha ka jingïakhun kaba long ha madan SSA mynta ka miet.
Ha kane ka jingïalehkai, tang u Samuel Phawa marwei u la ïoh ban thep haduh lai kol kata ha ka minit kaba 25, bad ar tylli kiwei pat u thep tang hapoh ar minit kata ha ka minit kaba 45 bad kawei pat ha ka minit kaba 45+1.
Shwa kane dei u rangthep kol ba kynsai tam ka kynhun u Nelson Rymbai uba ïoh ban pynkhih jar nyngkong eh tang ha ka minit kaba 4 jong ka kylla step. Mynta u Nelson u la ïoh ban thep haduh 15 kol ha kyrteng jong u. Ïa kawei pat ka kol na bynta ka kynhun la ïoh ban thep da u Denelson Pyngrope ha ka minit kaba 10 jong ka kylla step.
Mynta ba la rung ka Langsning, ka jingïakhun ha ka round robin jong ka quarter final ka la bïang bad dep lut nadong shadong ban sdang na bynta ki phra tylli ki kynhun ban jam sha ka kylla kaba bud.
Kine ki kynthup ïa ka Nongkseh SSCC, Mawlai, SC, Shillong Lajong FC bad Rangdajied United FC ha ka Group A katba ka Nangkiew Irat SC, Rymbai Shkenshynriah SC, Langsning FC bad Maram FC ha ka Group B.
Ki ar tylli ki jingïalehkai ba nyngkong kin long mynta ka sngi Balang. Baroh ar tylli ki jingïakhun kin long ha ka Group A ha madan SSA Stadium. Ha ka por 2baje janmiet ka Nongkseh kan ïakhun pyrshah ïa ka Mawlai bad ha ka por 6baje janmiet ka Lajong kan ïakhun pyrshah ïa ka Rangdajied.
