Ranikor, Jymmang 12 : Ka Ranikor Civil Sub-Division Sports Association ka la ïoh ban pynkut noh ïa ka jingïalehkai phainal jong ka 1st bad 2nd Division Football League 2025 – ‘26 ha Madan Nolikata hapoh ka Ranikor Civil Sub Division, South West Khasi Hills District ha kaba la wan ban sakhi da kiba bun ki paidbah nongkyrshan phutbol jong ka thaiñ.
Ha ka jingïakhun phainal jong ka 2nd Division, ka jingïalehkai ka la long hapdeng ka Panchiring Sports Club bad ka Nonghyllam Sports Club. Ka jingïakhun ka la long kaba itynnad bad kaba jingïaknieh bha namar baroh ar tylli ki kynhun ki la ïa ryngkat bor bha.
Ha ka kyllastep, ka Panchiring Sports Club ka la ïoh ban pynkhihj ar nyngkong ha ka minit kaba 15 lyngba u Skyning Thongni. Hynrei, ka Nonghyllam Sports Club ka la lah ban pynphai kylla bad pynïakhaid ha ka minit kaba 23 lyngba u Malkizadek Nongtnger. Kumta, haduh kaba kut jong ka kyllastep, ka jingïalehkai ka la long mar shi kol.
Haba wan biang ha ka kyllamiet, baroh ar kynhun ki la ïakhun tyngeh ban thep kol hynrei kim shym la ïoh ban pynkhih jar shuh. Kumta, ka jingïalehkai ka la kut ha ka jingïakhaid mar shi kol bad la pynbeit ïa ka jingïalehkai lyngba ka Tie Breaker ha kaba ha kane ka jingïashut, ka Nonghyllam SC ka la jop da 5 – 2 pyrshah ïa ka Panchiring SC.
Da kane ka jingjop, ka Nonghyllam SC ka la ïoh ban rah ïa ka song pisa kaba T. 20,000/- ryngkat bad ka khusnam, katba ka Panchiring SC ka la ïoh ïa ka song pisa kaba T. 10,000/- ryngkat bad ka khusnam. Kine baroh ar tylli ki kynhun kin sa ïoh rung sha ka 1st Division ha u snem ban wan.
Ha ka jingïalehkai jong ka 1st Division, ka Evergreen Sports Club ka la long ka lahduh jong ka samoi jingïalehkai 2025 – 26 hadien ba ka la ïoh haduh 16 poiñ, katba ka Balat Sports Club kaba wan ba-ar ka la ïoh 14 points.
Ha ka jingsam ïa ka khusnam ka Evergreen Sports Club ka la ïoh ban rah ïa ka song pisa kaba T. 40,000/- ryngkat bad ka khusnam. Ka Association ka la sam ruh ïa ki khusnam shimet sha ki nongïalehkai kiba la paw ha kane ka lympung kata ki Khusnam Shimet ha ka 1st Division ki long u nongthep bun kol dei u Arju Lyngdoh Marshillong (Evergreen SC), u ‘rangïalehkai ba tbit dei u Kyrshan Dkhar (Evergreen SC) bad u nongapkol ba tbit dei u Chingchang A. Sangma (Photkylla SC).
Katba ha ka 2nd Division ki long u nongthep bun kol dei u Hillarious Hahshah (Nonghyllam SC), u ‘rangïakehkai ba tbit dei u Gorof Sangma (Panchiring SC) bad u nongapkol ba tbit dei u Junelang Nongtnger (Nonghyllam SC).
Kiwei de ki program kyrpang ki long, ka jingrwai kyrpang na i Miss Linza Pressly Pariong bad ka jingïashad tynrai na ki khynnah skul jong ka Nolikata Higher Secondary School.
La pynshongshit shuh shuh ïa kane ka sngi da ka jingïadonlang u bah L.T. Tariang, MCS, SDO Civil jong ka Ranikor Civil Sub-Division, u bah S. Marweiñ, BDO ka Ranikor C&RD Block ryngkat bad ki ophisar na ki tnad treikam bapher bapher jong ka Ranikor C&RD Block.
