Kynnoh leh kynshleiñ u Prof ïa 2 ngut ki samla pule ka CPGSAS Umiam, dawa weng kam mardor

Nongpoh, Jymmang 11: Ki samla pule jong ka College of Post Graduate Studies in Agricultural Sciences (CPGSAS), CAU (Imphal), Umiam, mynta ka step ki la mih paidbah ban pynlong ïa ka jingïakhih paidbah bad shong kyllaiñ myngor ha phyllaw jong ka skulbah, ban dawa ïa ki bor pynïaid ba kin wengkam mardor noh ïa u Prof. Pranab Dutta, Chairman ka School of Crop Protection, uba la shah kynnoh ba u donkti leh kynshleiñ pyrshah ïa ar ngut ki samla pule kynthei hapoh katei ka jaka pule.
Ki samla pule kiba wan na ki jylla bapher bapher jong ka ri ban bteng ïa ki jingpule ha katei ka skulbah, ki la pynpaw ïa ka jingsngewkhia kaba jur halor katei ka jingjia kaba, katkum ka jingïathuh jong ki, ka la jia naduh kine ki bnai ba la dep hynrei haduh mynta ym pat shym la don kano kano ka sienjam pyrshah ïa utei u nonghikai wat hadien ba ki la dep ban ujor sha ka Internal Complaint Committee (ICC).
Ha ka jingïakhih, ki samla pule ki la rah ruh ïa ki placard kiba pynrem jur ïa ka jingshah lehbeiñ jong ki samla kynthei hapoh ki jaka pule bad ban pynpaw ba ki samla pule kim dei ban long ki langkñia haba ki leit wad jingnang jingstad. Ki samla ki la pynskhem ruh ba lada ka Internal Complaint Committee kam shimkhia ban leh eiei halor katei ka jingkynnoh, kin nang bteng ïa ka jingïakhih bad kin sa shim da kiwei pat ki sienjam.
Hadien katto katne por jong katei ka jingïakhih, la wan poi ruh ki pulit lem bad u majistor kiba la pyrshang ban pynjai-jai ïa ka jinglong jingman bad bthah ïa ki bor ba dei peit jong ka skulbah ba kin pynlong mardor ïa ka jingtohkit kaba bniah lyngba ka Internal Complaint Committee bad ban pynpaw paidbah ïa ka kaiphod jong ka jingtohkit. Ka jingdawa kaba hakhmat eh jong ki samla pule ka long ba dei ban wengkam syndon ïa utei u professor namar katei ka jingleh jong u ka la ktah jur ïa ka jingshngaiñ bad jingshanñiah jong ki samla pule.
Ban kyrshan ïa kine ki samla pule, ki nongïalam jong ka Women Organization of Ri Bhoi (WORD) hapoh ka jingïalam jong ka Kong Mirajune Myrsing kum ka President bad ka Kong Rivulet Kylla kum ka nongaibuit, ki la leit ruh sha katei ka jaka ban wad jingtip bad ai mynsiem ïa ki samla. Ka seng ka la pynpaw ba kiba bun ki samla kynthei ki wan na jngai ban wad jingnang jingstad bad kum ka seng kam kwah ba kine ki briew ba nabar ki wan ban pynlong ïa kane ka jaka kum ka jaka lehbeijot ïaki khynnah pule bad kum ka seng ka pynrem jur ïa utei u nonghikai u la nud ban leh kum katei ka jait kam ban pyntieng pynsmiej ïaki samla pule.
Ka WORD ka la pynrem jur ïa katei ka jingjia bad pynpaw ruh ba kum kine ki jingjia kim dei kiba jia ha kane ka district hynrei ha kylleng ki jaka bad ki samla pule kim dei ban tieng ban mih shakhmat ban sei madan ïaka jingshisha bad naka liang ka seng ka pynpaw ruh ka jingsngenguh ïa u SP bad DC kiba la shimkhia mardor hadien ka jingpyntip bad phah ruh ïaki pulit bad majistor sha katei ka jaka.