Bun ki samla ba khlemkam khlemjam, hynrei ka sorkar ka thungkam biang ïa ki sahep ba la shongthait:HYC

Shillong, Jymmang 11: Ka Hynñiewtrep Youths’ Council (HYC) ka la pynpaw ka jingpyrshah kaba jur bad ka jingsngewkhia kaba jur halor ka jingthung kam biang kaba dangshen ïa ki ophisar kiba la shong thait halor ka honorary basis da ka Meghalaya Legislative Assembly Secretariat lyngba ki office order ba tarik 26, bnai Lber 2026 bad ha ka 5 tarik u bnai Jymmang, 2026.
Ka seng ka ong ba ka jingthungkam ïa ki ophisar ba la shongthait sha ki kyrdan kum Adviser (Rules Committee) bad Senior Nazir sa shisien ka la paw biang ka jingsngewkhia na ki paidbah halor ka jingïai bteng ban leh biang bad ban pyndonkam ïa ki ophisar ba la shongthait, katba da ki hajar ngut ki samla kiba la nang la stad kim donkam donjam ha Meghalaya kiba dang ïaibteng ban ïakhun bad wad ïa ki lad ïohkam ïohjam.
Na ka liang ka HYC ka ngeit ba kum kine ki jingthungkam kip hah ka khubor kaba bakla bad kaba pynduh jingkyrmen sha ki samla jong ka jylla. “Ha ka por ba bun na ki samla kiba la tbit ki dang ap ïa ki lad ïoh kam sorkar, kane ka jingïaibteng ban pyndon bynta ïa ki briew kiba la shongthait ka khang lad ïa ka jingthungkam kiba thymmai, ka jingkyntiew kyrdan bad ki jingkiew ki kam ki jam,” ong ka kyrwoh na u President ka HYC u Bah Roy Kupar Synrem.
U la ong ba ki jaka treikam paidbah, khamtam kum ka Meghalaya Legislative Assembly, ki dei ban pynneh ïa ka khuid ka suba, ka jingbeit ka kheiñ ka diah bad ka jingailad kaba ryngkat ha baroh ki jait thungkam.
Halor kane, ka HYC ka dawa ba dei ban bishar biang ïa kine ki jingthungkam; ban pynpaw paidbah ïa ki rukom treikam kiba don shalyndet ha kine ki jingthungkam, ba dei ban don ka jingai kam shwa bad ban kyntiew ïa ki nongtrei kiba la bit dor bad kumjuh ruh ïa ki samla ha ki kam sorkar jong ka jylla.
Ka HYC ka la banjur ba ki samla ka Meghalaya ki donkam ka jingïohlad kaba khuid halor ka ïohkam ïohjam na ka bynta ka jingbha jong ki paidbah bad kyrpang na ka bynta ka pateng ki samla kiba long ka lawei jong ka jylla, ong u Bah Roy Kupar Synrem President HYC-CEC.