Pynkut noh ka ïingbishar HC ïa ka mukotduma POCSO hadien ba ki shijur ki la ïashongkurim bad don 3 ngut ki khun

Shillong, Jymmang 7 : Ka ïing Bishar High Court jong ka jylla ka la pynkut noh ïa ka mukotduma POCSO pyrshah ïa uwei u briew hadien ba ka la lap ba ki shijur ki la ïashong kurim bad don lai ngut ki khun. Ka ïing Bishar ka shim ïa kane ka rai namar ka sngew ba lada pynïaid shakhmat ïa kane ka jingbishar ruh kan ym wanrah kano kano ka jingmyntoi ïa ka kurim ne ïïa ki khun ruh kumjuh.
ïa kane ka rai la shim da ka Chief Justice Revati Mohite Dere . Ha kaba nyngkong eh ïa ka Ejahar la ujor ha Madanrting Police Station kat kum ka kyndon 4,6,17 jongka POCSO Act 2012. ïa kane ka jingpynkut ïa kane ka mukotduma la leh hadien ba kine ki arngut shijur ki la ïashong kurim bad don lai ngut ki khun.
Kat kum ka jingujor ba kane ka khynnah ka dang rit bad une u shynrang u la samla ha ka por ba ki ïa kynduh. Hynrei hadien la lap ba kane ka jingïadei jongki ka dei da ka jingïasngewthuh jingmut bad jingïaieit . Hadien ba kane ka khynnah kynthei ka la punkhun bad u rangbah shnong u la ujor Ejahar. Hynrei kine ki shijur ki la ïathoh shong kurim kat kum ka riti ka dustur ha kane ka rilum Khasi bad Jaintia. Ki la iathoh ha khmat u Parish Priest jongka Good Shepherd Parish, Jongksha.
Ka ïing bishar ha ka 9 tarik Iaiong 2026 ka la bthah ïa ki shijur ban leit mih hakhmat ka Secretary jongka High Court Legal Services Committee ban pynthikna la ka kynthei ka la mynjur bad ka dei ka jingshisha ne em ba ki la dep ïathoh shongkurim. La lap ruh ba ki ïasah lang bad ki kmie ki kpa ha kajuh ka ïing.
Une u kurim u trei kum u misteri bad u ioh kumba 9 hajar tyngka ha ka shibnai bad u peit bad u ri u sumar ïa ki khun ki kti bad ka kurim. Ka kurim ka la ong ba kam don kano kano ka jingpyrshah ban pynkut noh ïa kane ka mukotduma. Ka la ïathuh ruh ba ka khlem ïoh kano kano ka jingïarap na ka sorkar jylla. Ka la ïathuh ba ki hap ban pynlut bun ka pisa ban ïaleh ia kane ka mukotduma bad kane ka la wanrah ka jingeh kaba khraw bha ïa ki. Mynta ka kwah ban bteng ïa ki jingpule bad ban pyntbit ha ka kam suhjain. Ki pulit ruh ki la ai jingtip ba kine ki shijur ki ïa im bha im miat bad ïaieit bha bad ri ïa la ki lai ngut ki khun.
Kumta hadien ba la bishar nadong shadong bad lap a ki jingshisha ka ïing bishar ka la pynkut noh ïa kane ka mukotduma. La bthah ba kane ka kmie bad ki khun ki dei ban ïoh jingïarap na ki 15 tylli ki skhim ka sorkar.