Shillong, Jymmang 10: Ka National People Women Front (NPWF) Mylliem Block ha ka sngi Saitjain ka 9 tarik u Jymmang kala rakhe ïa ka Mother’s Day ne ka sngi ba kyrpang jong ki kmie, kaba la pyndap da ka jingkmen ba khraw bad ka jingïatylli. Ïa kane ka jingrakhe ïa ka Mother Day la pynlong ha ka shnong Mawwan kaba hap hap Mylliem Lum bad ha kane ka sngi la ïadon bynta lang ki longkmie kumjuh ruh ki riew rangbah kiba la shah khot sngewbha. Ka kongsan ha kane kadei ka sngi ka Kong P. Nongpluh kaba dei ka National Vice President ka NPWF ka la long kum ka kongsan, katba u Bah Hamletson Dohling, MLA barim jong ka Mylliem Constituency bad uba dei ruh u Working President ka Meghalaya State Unit, u la long kum u Symbud Kongsan. Ha kane ka prokram la pynpaw ïa ka jingburom bad jingieid sha ki longkmie kiba long ka bynta kaba kordor ha ka longïing longsem bad ha ka imlang sahlang.
Ha kane sngi ïa jingïalang la pyniaid da ka Kong Agnes Kharsohnoh, President ka NPWF Mylliem Block bad ka jingdon lang ki riew rangbah kiba la ai jingkren halor ka jingdonkam bad ka bynta kaba khraw jong ki kmie ha ka imlang sahlang.Ha kane ka sngi la ai jingïakren kiba kynthup ïa u Rangbah Shnong Mawwan Bah K. Lyngdoh, ka Kong Damelari Ryntathiang, President ka NPWF East Khasi Hills, bad ruh ka Sister na Pomlum PHC.Ki nongkren kila pynpaw ïa ka jingai burom ïa ki longkmie kiba trei shitom ha ka ïing ka sem bad ha ka imlang sahlang.Ki la kyntu ruh ïa baroh ban bteng ban kyrshan, burom bad sngewnguh ïa ki kmie ha baroh ki liang jong ka jingim.
