Nongstoiñ, Jymmang 10: Ha ka sngi saitjaiñ ka 9 tarik Jymmang u bah Kimfa Sydney Marbañiang MLA bad MDC barim ka Rambrai Jyrngam constituency u la lum ïa ki paitbah nongkyrshan ha ïngsah jong u ha Rambrai ban ïapyrkhat kumno kin leh ha kane ka MP Election shiteng samoi bad ruh ban ïpyrkhat na ka bynta ka MLA Election ha u snem 2028.
Ha katei ka sngi da ki spah ngut ki nongkyrshan jong u na kylleng ki jaka ki la ïapoi.
U bah Kimfa haba ïakren bad u nongthohkhubor hadien bala wai ka jingïalang u la ong ba ka jingïa lang ka la ïatai sani bha halor kiba bun ki jingdon kam bad ka ka la ïakut ban thaw noh da kawei ka kynhun ba thymmai kaba la tip kum ka Rambrai Jyrngam People United Forum bad la jied ïa u bah Kimfa kum u Chairman bad u bah Kitborlang Lyngdoh kum u secretary. Haba kylli pat ba ha kane ka MP Election shiteng samoi ïa kano ka seng saiñpyrthei kin leit ban kyrhsan hakaba u la ong ba ïa mynta ka jingïalang kam pat lah ban ong ïano kin kyrshan. Ha kajuh ka por u bah Kimfa u la ong ba ka jingïalang ka la ïapyrkhat ruh na ka bynta ka MLA Election jong u snem 2028 hynrei kim pat shim satia ïa ka rai ban pan tiket na kano kano ka party tangba kin sa shong puyrkhat biang kumno kin leh la kin pan tiket na ki party ne kin pynïeng kum u kyrtong shimet ruh kim pat lah ban ong hynrei ka por hi kan sa batai.
