Shillong, Jymmang 10: Hadien ka jingpynkut ïa ki jingïalehkai group stage, ki 16 tylli ki kynhun kiba la rung sha ka Pre Quarterfinal jong ka lympung 5th Meghalaya State League kin pynkhreh ïa ka jingtynjuh kaba kham pher ha kane ka sngi Nyngkong ha kaba kane ka lympung kan ïoh ban sdang ïa ki jingïalehkai jong ka Round of 16 ban sa pynlong ha ki hynñiew tylli ki jaka bapher bapher ha kylleng ka jylla.
Ka jingïakhun kaba itynnad tam na kine kan long kaba nyngkong eh ban sdang – kata hapdeng ka lahduh jong ka Group B ka Nangkiew Irat SC bad ka Khimusniang SC kaba wan ba-ar ha ka Group A. Kane ka jingïalehkai kan sdang ha ka por 1baje mynsngi ha madan First Ground-SSA Stadium.
Lah ban ong ba Nangkiew Irat, ka klob ïalehkai kaba na Shillong, ka la ïohmad ïa ka jingïakhun kaba suk ban poi sha ka kyrdan ba ha khlieh duh jong ka Group hynrei ka jingtynjuh kan long kaba kham khraw ynda ka aireng pyrshah ïa ka Khimusniang. Kane ka kynhun ka dei kawei na ki klob kaba kyrpang tam ha ka MSL 5 – hadien ba ka la rah ïa ka West Jaiñtia District Sports Association’s Super Division 2025, nangta ka la ai ïa ka jingïakhun kaba jwat pyrshah ïa ka Nongkseh SSCC ha ka Group A, kawei na ki klob ba don jingkyrmen ban rah ïa ka nam lahduh ha ka MSL, bad ki khynnah shynrang na Jowai kin thrang shisha ban pynkhyllem noh ïa ka Nangkiew Irat bad jam sha ka wat ïakhun kaba lai.
Katba ka Nongkseh, kan sa ïakhun kham hadien, ha ka por 5:30 janmiet ha kajuh ka madan, pyrshah ïa ka Mawphu SC kaba wan ba-ar ha ka Group B. Lah ban kdew ba ka Mawphu jong ka Sohra Sports Association, ka don katto katne ki nongïalehkai kiba don sap hynrei ka jingjop pyrshah ïa ka Nongkseh kan long kaba phylla.
Nangta ka Mawlai SC, kaba bat ïa ka nam lahduh, kan ïakhun pyrshah ïa ka Thangskai Tiger SC ha Amlarem. Ka Mawlai ka la wan hakhlieh duh ha ka Group C, katba ka Tigers ka la wan ba ar ha ka Group D. Watla katto katne ngut ki rangïalehkai ba la kham shemphang ki la duh noh ïa ki katto katne ki jingïalehkai group stage namar ba ka Mawlai ka la don bynta ha ka I-League 3, hynrei ka kynhun ka dei ban khlaiñ pura mynta ba ki la wanphai noh sha la ïing. Ka Thangskai ka la dei ka kynhun kaba khlaiñ ha ka lympung phutbol ka East Jaintia Hills ha kine ki samoi ba la dep bad kane ka dei ban long ka jingïakhun kaba itynnad.
Ka bat kyrdan ba nyngkong ha ka Group D ka dei kawei pat ka kynhun jong ka EJH, ka Rymbai Shkenshynriah SC. Haduh mynta ki khlem shah rem, ha kaba ki la jop san sien bad ïakhaid shi sien, bad kan ïakhun pyrshah ïa ka Amlarem SC, kaba wan ba-ar hadien ka Mawlai ha ka Group C. Ka Shkenshynriah ka la rung ruh sha ka semifinal ha ka MSL 4 bad ka pawshai ba kan kwah la kumno kumno ban pynurlong biang ha kane ka kynti kaba mynta.
Ka Shillong Lajong FC, lahduh barim jong ka MSL, kaba ïakhun na ka Group E ha Wahiajer kan aireng pyrshah ïa ka kynhun ba wan ba ar ha ka Group F ka Mishon SSCC. Ka Lajong kaba la rah ïa ka nam lahduh ha u snem 2019 bad kaba la wan ba ar hadien ka Mawlai ha ka sienjam ba la dep, ka la jop ïa baroh hynriew tylli ki jingïalehkai group stage da kaba suk bad kan khmihlynti ban weng noh ïa ka Mishon ha kajuh ka rukom.
Ka Mishon ka la pyndep kyrdan ba ar ha ka Group F hadien ka Langsning FC – kawei na ki klob ba khlaiñ ha ka histori jong ka phutbol ha Meghalaya ka bym pat shym la jop ïa ka MSL haduh mynta. Ka Langsning kan hap ban aireng pyrshah ïa ka Lumphyrnai Sohphoh FC, kaba pyndep kyrdan ba ar hadien ka Lajong ha ka Group E.
Ha Williamnagar, ka Janepih YSCA ka la long kaba khlaiñ bor, da kaba shah rem tang shi sien ha ka jingïakhun jong ka ban bat kyrdan ba nyngkong ha ka Group G. Kin ïakynduh pyrshah ïa ka kynhun ba wan ba ar ha ka Group H, ka Rangdajied United FC, lahduh jong ka MSL ha u snem 2023, kaba la mad ïa ka jingïalehkai kaba sniew ha kane ka samoi hynrei kiba thrang pat ban wanrah ïa ka jingkylla.
Ka Seng Samla Umdang Pyllun ka bat ïa ka kyrdan ba nyngkong ha ka Group H bad kan ïakhun pyrshah ïa ka Maram FC (ba ar ha ka Group G) ha Mawkyrwat.
Ka Umdang Pyllun, ka Rangdajied bad ka Mawten baroh ki la pynkut da 8 poiñ hadien ba la kut ka group stage ha kaba ka Mawten ka la duh rung katkum ka jingmih jong ki jingïalehkai ba ki ïakynduh pyrshah kawei ïa kawei pat lane head-to-head, kaba la kheiñ nyngkong shwa ïa ka jingïapher kol. Ka Maram ka la shah rem arsien ha ka group stage bad ka dei tang ma ka ka kynhun kaba dang sah na Garo Hills bad kin kyrmen ban jam shakhmat ha kane ka lympung.
