Shillong, Jymmang 9: Ka seng ki samla pule Khasi Student Union (KSU) mynta kila ioh ïa ki nongkitkam ba thymmai kum ki dkhot ka Central Executive Committee na ka bynta ka samoi trei kam 2026 haduh 2029 bad ia kane ka kynhun ba thymmai la ialam da u samla Raymond Kharjana kum u President.
Ha kane ka sngi na ka liang ka Election Committee kala pynlong ïa ka election kaba 16 hadien ba la kut noh ka samoi trei kam jong ka CEC kaba rim bad ha kane ka election ki don lai tylli ki post kiba ym don kiba iakhun pyrshah bad kiba la jop suk.
Ka Post President ka leit sha u Samla Raymond Kharjana, General Secretary ka leit sha u Samla Reuben Najiar bad ka kam Vice President ka leit sha u Samla Pynkmenlang Sanmiet kila jop suk.
Ha kane election la sdang naduh ka por 8 baje myntsep bad la niew ruh ia ka vote ha kane hi kajuh ka sngi ia kaba la pynlong ha Dinam Hall, Jaiaw Shillong.Ki unit kiba la poi sha kane ka jingthep vote ki long haduh 480 tylli bad na kawei ka unit la shah ban thep vote tang 10 ngut.
Ha kaba iadei bad ki unit jong ka KSU kiba don shabar jong ka ri Khasi kum na ka thain Cachar Hills, na Mizoram bad kiwei kiwei kila wan ban thep vote katba ki unit na Bangalore bad Delhi kila shu thep vote online.
Hadien ba la dep ban niew ia ki vote u Secretary jong ka Election Committee u Bah Samuel B Jyrwa uba dei ruh u Chairman jong ka NESO u la pynbna ia ka kyrteng jong ki nongjop kiba la iakhun ha kane ka election.
Ha kane ka sngi la don lang ruh ki nongpeit pyrman halor kane ka election ba kynthup ïa u Bah Geffry Basan uba dei u General Secretary ba nyngkong eh jong ka KSU, U Bah Danny Khyriem uba dei u Chairman ka Election Committee bad u Bah Samuel B Jyrwa kum u Secretary.
Na ka liang ki nongialam barim kila iarap ruh ban pynbit pynbiang ïa ki jingdonkam ha kaba iadei bad kane ka election bad kiba la iarap ruh ban niew ïa ki vote.
