Nongstoiñ, Jymmang 08: Kumba phraphew na ka shispah ki nongshong shnong ha West Khasi Hills ki dei kiba dang im ha ka rep ka riang bad kim pat don da kiwei pat ki lad kamai ban kyrshan ïa ka ïng ka sem bad ka jingim ba man la ka sngi jong ki. Haba phai pat ha ka jingnang jingstad jong ki samla ym lah ban len ba ka la nang kiew na ka por sha ka por bad ka thong jong kiba bun ki samla ka long ba ynda ki la pyndep ïa ka jingpule ki dei ban ïoh kam sorkar.
Nalor kata haba phai ha ka jinglong jingman jong ka West Khasi Hills ka dei ka district kaba ka rep ka riang ka long kaba biang bha bad la donkam ïa ki samla kiba la nang la stad ba kin pynleit jingmut kumno ban kyntiew ïa ka rep ka riang khnang ba ka ïoh ka kot ka kamai ka jih kan kiew. Ym lah ban len ruh ba lada ki samla ki pynleit jingmut ha ka rep ka riang kan ym don ka jingkyrduh kam kumta ka Skulbah na ka bynta ka rep ka riang ka la don kam ban don ha West Khasi hills khnang ba ki samla kin leit pyntbit ha ka kam rep kam riang bad ka thung ka tep.
Ha kaba ïadei bad katei ka mat na ka liang ki nongïalam jong ka Federation of Khasi Jaintia & Garo People West Khasi Hills lyngba ka Agricultural cell ki la kyntu ïa ka sorkar na ka por sha ka por ba kan thaw ki lad ki lynti kumno ban pynïoh ïa katei ka skul bah hapoh ka distrik khnang ba ki samla kin ïoh lad ban leit pyntbit namar bun ki don shibun bah ki long ïng long sem kiba duk ba kyrduh ki bym lah ban kyrshan ïa ki khun lada ki leit ban pule bad pyntbit sha kiwei pat ki jaka namar ba ka jinglut jingsep ka bun hynrei lada ka skul bah ka don hapoh ka district ka jinglut jingsep ka duna.
Ha kajuh ka por ki nongïalam jong ka tnad trei kam jong ka seng ka la ju dawa ruh ba ka sorkar ka la dei ban pynkhlaiñ shuh shuh ïa ka jingtrei kam ha ki artylli ki tnad treikam kata ka Horticulture bad ka Agriculture kiba don hapoh ka distrik ba kidei ban trei shitom ban pynsngewthuh ïa ki paidbah kumno ban kyntiew ïa ka rep ka riang khamtam ïa ki paidbah ha ki nongkyndong ba kin leit ban pynsngewthuh ba kin sdang ban rep ban riang da ki buit thymmai ym ban shu bud sah ïa ka rukom rep kaba rim. Ha kajuh ka por ki la pynkynmaw ba bun ki nongkyndong ki ju ïoh ïa ki jingiarap na ka ophis Horticulture bad Agriculture ïa ki jingïarap kum ki symbai, ki dawai sboh, ki mashin lur lyngkha bad kiwei kiwei hynrei ka sorkar kam pat lah ban pynbiang satia kat kum ka jingdon kam jong ki paitbah khamtam ïa ka dawai sboh kaba ki nongrep ki donkam ha ka por ba biang.
