Amlarem, Jymmang 07: Ka jingai jinghikai ba 3 (lai) sngi lynter na ka bynta ki Enumerators bad ki Supervisor ha kaba ïadei bad ka jingkheiñ khana samari (Census) jong ka Ri India 2027 la pynkut mynta ka sngi ha Amlarem C&RD Block, West Jaiñtia Hills. Ïa kane ka prokram la pynlong kum shi bynta jong ki kam pynkhreh na ka bynta ki kam Census ki ban sa wan.
Ha kane ka prokram la wan ban ïashim bynta da u ma Lahkmen Rymbui, MLA ka Amlarem Constituency bad u Myntri ba dei peit ïa ka tnad Pule Puthi, Information & Public Relations, Law bad ka tnad Revenue & Disaster Management, kum u Kongsan. Ha kane ka sngi la ïa donlang ruh u Dr. Damuthimi Lyngdoh, Block Development Officer jong ka Amlarem C&RD Block, u ma Medling M. Swer, MDC ka War East, u ma Kampher Pohlong, Secretary ka Synjuk ki Rangbah Shnong War Jaiñtia, ki ophisar jong ki tnad treikam bapher bapher, ki nongïalam shnong bad ki Supervisor bad ki Enumerator.
Baroh kila don 120 ngut ki nongïashim bynta ha kane ka prokram ai jinghikai, ba kynthup ïa 102 ngut ki Enumerators bad 18 ngut ki Supervisor.
U ma Lahkmen Rymbui haba ai jingkren ha kane ka jingïalang ula pynpaw watla ha kaba nyngkong la thmu ban leh ïa ka Khanasamari ha u snem 2021 hynrei la hap ban pynsangeh noh namar ka khlam Covid-19. Ula ong ba ka Khanasamari jong ka ri India 2027 ka long kaba kongsan haduh katta katta na ka bynta ka ri bad pyntip ba kane ka Khanasamari kaba mynta kan pyndonkam bha ïa ka digital technology bad ki rukom peit bniah online na ka bynta ban lum jingtip bad pynshisha.
U Myntri ula pyntip ba ka jingtreikam jong ka Census ka kynthup ïa ki bynta bapher bapher, kynthup ïa ka jingkheiñ ïalade, ka jingkheiñ ïa ka jingdon ki ïing bad bud sa ka jingkheiñ ïa ki nongshong shnong ha u snem 2027. Ula ban jur ba ka jingkheiñ jingdiah kaba thikna ka long kaba donkam bha namar ba bunsien ki skhim sorkar, ki projek pynroi bad ki prokram ai jingïarap ki long katkum ka jingkheiñ jingdiah jong ka Census.
Ula kdew katto katne ki shnong kiba la seng hadien ka Census 2011 kim shym la lah ban ïoh ïa kiba bun ki jingmyntoi na ka sorkar namar ka jingbym shym la pynrung ha ki kot ki sla jong ka Census. Ula pyntip ba ïa ka thup Census la pynsangeh noh naduh ka 31 tarik u Naiwieng 2025 bad yn kheiñ lut ïa baroh ki shnong bad ki longïing kiba kynthup hapoh ka por ba la buh.
Haba pynpaw ïa ka jingdonkam ban ïashim bynta lang, u ma Rymbui u ong ïa ki jingtip kiba ïadei bad ka jingdon jong ki longïing, ka jingbun briew, ki skul, ki surok, ki umbam umdih bad ki kam pynroi bapher bapher baroh la pynïasoh bad ki jingthoh jong ka Census. Ula ban jur ruh ïa ka jingdonkam ban kynthup lang ïa baroh ki nongshong shnong kiba dei hok, kynthup ïa kito kiba sah shabar jong ka shnong ne ka jylla, khnang ba ym don uwei ruh u nongshong shnong ba shisha uba shah ieh beiñ.
U Dr. Damuthimi Lyngdoh, BDO ka Amlarem C&RD Block, ha ka jingkren jong u, u la ong ba ka jingpyntreikam ïa ka Census ka long kaba kongsan bha na ka bynta ki kam pynroi bad u la khot ka jingïatreilang naduh ki nongïalam shnong bad ki nongshong shnong ban pynthikna ba kane ka jinglum jingkheiñ kan long kaba ïaid beit ïaid ryntih. U la pyntip ba ki Enumerators bad ki Supervisor kin shimkhia ïa ka kam ha baroh ki shnong kiba hap hapoh ka Block.
Ka bynta ba nyngkong jong Self Enumeration kan long naduh ka 1 tarik u Jymmang 2026 haduh ka 15 tarik u Jymmang 2026, katba ka jingpynshisha ha ki jaka bad ka jingpynrung kyrteng ïa ki ïing kan sdang hadien jong ka bynta ba nyngkong jong ka jingkheiñ briew (Census) 2027.
