Mynjur ka kynhun Myntri Sorkar pdeng ïa ka Emergency Credit Line Guarantee Scheme (ECLGS) 5.0

New Delhi, Jymmang 06: Ka Kynhun Myntri jong ka sorkar pdeng ba la pynïaid da u Myntri Rangbah duh ka ri u Narendra Modi ka la mynjur ïa ka Emergency Credit Line Guarantee Scheme (ECLGS) 5.0.
Ka skhim ka thmu ban ai ka jingpynthikna ïa ka ram kaba 100% na ka bynta ki MSME bad 90% na ka bynta ki bym dei ki MSME bad kumjuh ruh ïa ka kam pynher liengsuiñ, sha ki Member Lending Institution (MLI) lyngba ka National Credit Guarantee Trustee Company Limited (NCGTC) na ka bynta ka pisa kaba sah hapoh ka jingai ram ba la pynjlan sha ki nongshim ram kiba dei hok ban ïarap haba don kano kano ka jingeh ha ka jingpynmih pisa ha ka por kaba lyngkot ha kaba ïadei bad ka jingeh ha West Asia.
Ki bynta ba kongsan jong ka skhim ka long, ki nongshim ram kiba lah ban shim ram, ki MSME bad ki bym dei ki MSME kiba don ïa ki kyndon kiba ïadei bad ka pisa treikam ba la don lypa bad ki liengsuiñ kit nongleit nongwan ba la buh por kiba don ïa ki lad jingïarap ba dang sahteng, naduh ka 31 tarik Lber, 2026, tang lada ki jingkheiñ jong ki, ki long kiba biang.
Ka jingpynthikna ba 100% na ka bynta ki MSME bad 90% na ka bynta ki bym dei ki MSME bad kumjuh ruh ha ka kam pynher liengsuiñ. Ka bai pynthikna ba ym don.
Ka jingheh jong ka jingkyrshan: Ka jingai ram shuh shuh haduh 20% na ka pisa treikam ba la pyndonkam ha ka Q4 FY 26 (la buh pud haduh T.100 klur). Na ka bynta ki kompeni liengsuiñ haduh 100% (la buh kyndon haduh T.1,500 klur na ka bynta uwei u nongshim ram, katkum ka jingpynbiang ïa ki katto katne ki kyndon ba kyrpang).
Ka samoi jong ka ram, Na ka bynta ki MSME/Ki bym dei ki MSME (lait noh ka kam pynher liengsuiñ): 5 snem naduh ka tarik ba la ai pisa nyngkong kynthup ïa ka jingpynsangeh kaba 1 snem.
Na ka bynta ka kam pynher liengsuiñ: 7 snem naduh ka tarik ba la ai pisa nyngkong kynthup ïa ka jingpynsangeh kaba 2 snem. Ka samoi jong ka jingpynthikna ban ai jingïarap: Ka por ba bun tam jong ka jingai jingïarap kan long ka por ba kut ka ram.
Ka samoi jong ka skhim: Ka skhim kan treikam na ka bynta baroh ki ram ba la mynjur ha ka samoi naduh ka tarik ba la pynmih ïa kine ki kyndon da ka NCGTC haduh ka 31.03.2027.
Ka jingktah, ka skhim ka thmu ban plie lad ïa ki kam khaïi ban ïaineh hapdeng ki jingeh kiba mih na ka jingïakynad ha West Asia. Nalor kata, la khmih lynti ba kane kan ïarap ïa ki kam ban pynneh ïa ka jingtreikam jong ki, ban ïada ïa ki kam, bad ban pynneh ïa ki jingpynpoi mar.
Ka skhim ai ram ba la tyrwa ban wanrah kadei ka sienjam kaba kongsan ban ïarap ïa ki kam khaïi, khamtam ïa ki MSME bad ka kam pynher liengsuiñ, ban pynthikna ba ki jingdonkam jong ki ha ka pisa treikam ba ki donkam shuh shuh, la pynbiang da ki Bank bad jingbei pisa na bar ri.
Da kaba ai lad ban pynmih pisa ha ka por kaba biang, ka skhim kan pynneh pynsah ïa ki kam bad kan ïada na ka jingduhkam. Kan kyntiew ruh ïa ka jingpynmih mar hapoh ka ri khlem jingthut bad kan pynneh ïa ka jingskhem jong ka kam.