SHILLONG, Jymmang 08: Ka lympung ïalehkai SSA U-20 Fourth Division Football league 2026 ka la jam mynta sha ka sngi ba ar hynne ka sngi Thohdieng (08 tarik Jymmang) da lai tylli ki jingïalehkai ba la pynlong ha madan First Ground bad MFA Ground. Hynne ka sngi Summit Football Academy, ka Umiew S&CO bad ka Lumkseh SC ki la ïoh mad ïa ka jingjop.
Ha ka jingïakhun ba nyngkong jong ka Group E, ka Summit Football Academy ka la lah ba kan pynliem noh da 3-1 kol ïa ka Laitkroh SC.
Ka Summit Academy ka la ïoh ïa ka jingsdang kaba paka da kaba pynkhihjar ar sien ha ka kylla step lyngba u Mebanshan Lyngdoh (16’min) bad u Opstarmoon Marbaniang (19’min). Nangta ka Laitkroh SC ka la pynphai shi kol lyngba u Baniaiker Khongsngi (29’min) shuwa ba u Seibrolang Mukhim (56’min) un thep ïa ka kol kaba lai na ka bynta ka Summit FA ban pynthikna ban khur pura ïa ki lai point.
Kumjuh ruh ka Umiew S&CO ka la lah ba kan jop ha ka Group E, hadien ba ka la pynliem salit da tang 1 kol pyrshah ïa ka Diengpasoh SC. ïa kane ka kol la thep da u Samenangshan Nongkhlaw ha ka minit kaba 31.
Nangta ka jingïakhun jong ka Group A ha MFA Ground, la sakhi ïa ka hat trik kaba la thep da u Fortunate Dakhar (1, 33 & 60’min) na ka bynta ka Imson SC, hynrei baroh ki la long lehnoh ei namar ka kynhun ka la shah rem noh da 4-3 ha ka jingïakhun pyrshah ïa ka Lumkseh SC.
Ka Lumkseh SC ka la pynkhihjar lyngba u Alexandria Nongbri (25’min), u Banteinanm Khonglam (32 & 54’min) bad u Mewanshwa Nongbet (46’min).
Ki jingïalehkai ka lympung SSA U-20 4th Division Football league 2026 kin bteng biang ha kane ka sngi Saitjaiñ (09 tarik Jymmang 2026) da lai tylli ki jingïakhun. Nyngkong ha ka por 1 baje mynsngi ka Them Rangshken SC kan aireng pyrshah ïa ka Phir kurbah MSS&CC (Group A), bud sa ha ka por 4 baje janmiet hapdeng ka Lumpyngngad SC pyrshah ïa ka Thynroit S&CC (Group-B). Baroh ar kin long ha SSA Stadium.
Katba kaba lai kan long ha MFA Ground ha ka por 4 baje janmiet hapdeng ka Laitlulong SC pyrshah ïa ka Don Bosco Academy (Group B).
