Watba la ap kmang baroh shisngi hap leit phai thylli khlem ïoh sanad ki paid ka Hima Sohra
Ryngkat ki lama saw puk tur ki paidbah sha KHADC
Shillong, Jymmang 07: Ki nongsynshar shnong jong ka Hima Sohra ha ka sngi Palei ki la leit tur sha KHADC ban dawa na ka Executive Committee jong ka KHADC ban ainoh ïa ka sanad ïa u Syiem Marremdor Sing Syiem uba la thung da ka Hima Sohra bad da ki spah ngut ki la ïapoi ban tur sha KHADC.
Hynrei wat hadien ba ki la ap kmang bad pyrta baroh shisngi bad ban wantur shaduh KHADC ban dawa ai sanad noh ïa u Marremdor Sing Syiem uba la shah jied da ki khun ki hajar jong ka Hima Sohra bad ba ka Executive Committee ka KHADC ba la ïalam da ka Voice of the people Party (PRAH) hynrei kine ki khun ki hajar bad ki nongsynshar shnong ki la hap ban leit phai noh thylli khlem da la ïoh ïa kaei kaba ki la dawa na ka KHADC.
Haba kren sha ki lad pathai khubor u Paiem Laborious Syiem ki la ïathuh ba ka KHADC ka la ïeng beit ha la ka nongrim naba don sa uwei pat uba kwah ban ïakhun ïa ka kam long Syiem kumta ka khlem da la ai ïa kane ka jingdawa jong ki wat hadien ba la ïa pyndep bad pynshai ïa baroh ki kam kiba long katkum ka riti dustur naduh ba sdang ban jied ïa u Syiem Marremdor sing Syiem.
La ïathuh ruh ba kane ka EC kadei kaba eh dohnud bad ha ka jaka ban pynneh ïa ki riti dustur hynrei pynban ka nongpynkheiñ ïa ki bad ki la pynshai ruh halor ka jingkwah ïakhun long Syiem jong u Bah P Syiem ba la kynnoh ba udei uba la shong sha Mairang bad u bym don jaka um don eiei shuh sha Hima Sohra.
Kumta halor kane ka jubab na ka KHADC ki la shim ïa ka rai ba kin khot biang ïa dorbar hima ban ïakren bad kumjuh ruh ban shim ïa kino ki sienjam ba kin shim nangne shakhmat.
“Ha ka jingshisha kane ka EC kaba thymmai kaba ngi la khmih lynti ba kan long ban trei haba shit ba shai, ngi nangnud ruh ba kan ïai long kumta, hynrei kan long pat kaba ym poi pyrkhat ba ha kane ka sngi ha ka jaka ban ïoh ka jubab kaba long katkum ka rai da ki khun ki hajar jong ka Hima Sohra bad kumjuh ruh kaba dei ruh kaba la ïamynjur da u khun u hajar hapoh ka Dorbar Hima, hynrei ka khlem long kumta, kumta la rai ba yn khot biang ïa ka rai jong ka Dorbar ban leh kumno nangne shakhmat,” ong u Paiem Laborius.