Jowai, Jymmang 06: U Deputy Commissioner ka West Jaiñtia Hills ha ryngkat ka jingïatrei lang bad ka Deputy Commissioner West Karbi Anglong ha ryngkat ka jingïadon lang ki SP ha ka 5 tarik Jymmang 2026 kila pynlong ïa ka jingïalang Peace talks Meeting ha ka shnong Khanduli na ka jingthmu ban poi sha ka jingïakren ïa suk halor ka kynrum kynram ba jia ha khappud.
Na ka liang u Waheh Shnong ka Lapangap ula pyntip ba hynnin ka sngi ka 5 tarik Jymmang 2026 kala don ka jingïalang hapdeng ki bor pynïaid District naduh u DC ka West Jaiñtia, DC West Karbi Anglong ki bor pynïaid District ki Pulit bad ki paralok na Karbi na ka bynta ka jingïakren ïasuk kaba la long ha shnong Khanduli.
U Waheh Shnong ka Lapangap u la ong ka jingïakren hynne ka sngi ka long kaba seisoh bad kaba bha bad na ka liang ka shnong haka janmiet jong ka 5 tarik ka la lum ïa ka dorbar bad kan ïai ap ïa kata ka 2 sngi 3 sngi ba ki bor pynïaid District ki la buh por ban wad ki lad ki lynti hapdeng ka jingsuk ka jingsaiñ.
Kumta naka liang u Waheh Shnong ka Lapangap u la ong ka dorbar ka la rai ban pynsangeh shwa ïa ka jingthmu ban leit sha ka Peace Rally sha Secretariat ka ban long lashai ka sngi ka 6 tarik Jymmang 2026 bad lada ki bor pynïaid District na baroh ar tylli kynthup na Karbi Anglong lada kim ai ïa ka rai babha ha kine ki 2 – 3 sngi, na ka liang ka Dorbar shnong kan sa shim da ki sienjam kiba tyngeh.
