Haduh T. 321 klur sha ka T. 770 klur ba pynkiewdor ïa ka New Shillong Township ka long ba pynlutkai pisa: HYC

Shillong, Jymmang 06: Ka Hynñiewtrep Youths’ Council (HYC) ka pynrem jur ïa ka jingkiew dor jong ka New Shillong Township (NST) Water Supply Project na ka 321 klur tyngka sha ka 770 klur tyngka hapoh kane ka sorkar MDA.
Kane ka jingkiew dor kaba jan kot sha ka 450 klur tyngka ka pynpaw ïa ka jingpynsepei ïa ka pisa paidbah, ka jingbym don plan kaba biang bad jingbym don jingïatreilang hapdeng ki tnad sorkar bapher bapher.
Ka long kaba ym lah pdiang ba ka projek kaba la sdang pynbit pynbiang ha u snem 2014 ha ka dor kaba long 321 klur mynta ka la kiew syndet sha ka 770 klur, na ki daw kiba ka sorkar hi ka phla ba ka dei namar ba ym shym pynkhreh ne bishar bniah shuwa ban sdang ka kam. Kine ki pynpaw ïa ka jingbym salia jong ka Sorkar ïa ka pisa u paidbah da kaba shu leh thurmur bad wanrah ka jingduh nong pat ïa ka Pla tyngka jong ka Jylla hi baroh kawei.
Ka HYC ka buh jingkylli: Mano ban shim jingkitkhlieh halor kane ka jingkiew jong ka dor? Balei ym shym la leh bha ïa ki feasibility studies bad jingpynkhreh shuwa ban mynjur ïa ka projek? Balei ka pla tyngka u paidbah kan shah ktah na ka jingbym lah treikam bad ka jingbym jingïohi jngai jong ka sorkar?
Ha kum kane ka por ba ki paidbah ka jylla Meghalaya ki ïakynduh jingeh kum ka jingbym donkam donjam, ki surok kiba sniew, ka jingduna um, ka jingbym biang ki jaka sumar bad ka jingbym don ki jingtei paidbah kiba kongsan, kane ka jingpynkiew jong ka dor projek ka pynmih ïa ki jingsngewkhia kiba jur la kane ka kam ka khuid ne em, don ei ei ne em sha lyndet bad ïoh lehse lah pyndonkam bakla ïa ka pisa Paidbah.
Ka pisa paidbah kam dei ka Nongkynti shimet jong kano kano ka sorkar lane contractor. Man la kawei pa kawei ka pisa kaba shah pynlut kai namar ka jingbym lah treikam lane ka jingthurmur jong ka Sorkar ka long ka jingñiewbeiñ ïa u paidbah ka Jylla hi baroh kawei.
Ka HYC ka kyntu ba ka sorkar ka dei ban sangeh ban shim sting ïa ka pisa paidbah bad ban pynthikna ïa ka jingkhuid suba ha ka rukom pynlut ïa ka pisa paidbah bad ka jingsynshar paidbah kaba don jingkitkhlieh, ong ka kyrwoh ba la phah da u Bah Roy Kupar Synrem President, ka Hynñiewtrep Youths’ Council (HYC), Sengkmie.