Shillong, Naitung, 16: Ki nongtrei jong ka EMRI-108 kiba don hapoh ka shatri jong ka Meghalaya EMRI Workers’ Union (MEMRIWU) ki la rai ban pynlong ïa ka jingïakhih kaba khlem pud sngi naduh ka step phyrngap 4:00 baje mynstep jong ka Lah Sngi u Blei ka 18 tarik mynta u bnai hadien ba ka Sorkar Jylla kam shym la shah skhor bad pynsngap ïa ka jingaipor kaba 72 kynta jong ka seng kaba la kut noh ha ka sngi Saitjaiñ.
Ki bor pynïaid jong ka GVK EMRI-108, Meghalaya ha ka sngi Thohdieng ki la kyrpad ïa ki nongtrei ba kim dei satia ban pynthut ïa ka jingshakri ïa ki paidbah kiba pang bashitom khamtam eh ïa kito kiba donkam ïa ki jingïarap bakyrkieh. Kane ka jingkyrpad jong u State Head ka GVK EMRI-108, u Deepankar Choudhury, ka long hadien ba ki nongtrei hapoh ka shatri jong ka Meghalaya EMRI Workers’ Union ki la ai por 72 kynta ïa ka Sorkar Jylla ba kan pynkut noh ïa ka kontrak kaba ladep ban soi bad ka kompeni GVK.
Mar mar, u Joint Mission Director jong ka National Health Mission u la khot ïakren ïa ki nongïalam jong ka MEMRIWU ha kaba um shym la lah ban ai ïa kano kano ka jingkular hynrei u la shu kular tang ban rah ïa ka jingdawa jong ka seng sha ki bor bahalor.
“Kum ki nongïalam jong ka Union ngi la ïakynduh ïa u Joint Mission Director bad ïa kiwei ki nongpynïaid jong ka National Health Mission (NHM) hynrei ka jingïalang kam long kaba seisoh bad dei namar kane ba ki nongtrei ka EMRI-108 kin sangeh treikam shwa naduh ka step jong ka 18 tarik” la ong President jong ka MEMRIWU ka Kong Microlina Syiemlieh.
Ka la ïathuh ruh ba watla u Mission Director (MD) jong ka National Health Mission (NHM) u la khot ïakren ïa ki nongïalam ha ka 18 tarik mynta u bnai bad lada ka jingïalang kam long kaba seisoh ka Union kan nang bteng beit ïa ka jingïakhih.
U Nongaiktien jong ka MEMRIWU u Bah Roypar Kharraswai haba bynrap halor kane u la ong, ba ka Sorkar Jylla ka mang pisa ym duna ïa ka T. 12 klur manla u snem sha ka GVK ban pynïaid ïa ka EMRI hynrei kane ka kompeni naduh 2018 ka juh leh byrtia ha ka pisa pilaiñ khnang ban ïoh jingmyntoi ïalade bad kane ka la ktah pat ïa ka rukom treikam.
U la kam ba manla u bnai ka Sorkar ka mang pisa T. 12 lak ryngkat bad T.5000 hajar ïa kawei ka kali Ambulance kaba donkam briew 5 ngut ban ai jingsumar ïa ki paidbah hynrei namar ka jingbyrtia bad ka jingduna nongtrei, ki nongtrei kiba don mynta ka kynti ki shah ñion bad ka kam ka kham khia katba ka tulop pat ka dei kaba rit.
“Watla ka Sorkar Jylla ka pynbiang biang ïa ka song pisa manla u snem hynrei kane ka kompeni GVK naduh 2018 ka ïaleh ban pynduna nongtrei khnang ban ïoh bhah pisa khambun ïalade bad kane jingbyrtia ka buh jingeh ïa ngi namar ngi ïa duna briew bad kane ka ktah haba ïadei bad ka jingai jingsumar ïa ki paidbah,” la kynnoh u Bah Roypar.
Shuh shuh u la ong ba ka Sorkar kam don jingeh ban shimti noh ha lade ïa ka EMRI namarba ki nongtrei baroh ki dei kiba lah biang ka jingnang jingtip ha baroh ki liang ha kaba ïadei bad ka jingshakri ha ka EMRI, lada dei ha Management ne ban ai jingsumar ïa ki bapang.
Ka la ïathuh ba ka jingaipor jong ki 72 kynta ïa ka sorkar jylla ban weng ïa ka GVK Company kum ka non gpynïaid ïaka EMRI ka la kut hynrei haduh mynta ka Sorkar lyngba ka tnat ka Koit ka Khiah ne u Myntri ka dang leh kyllut bad kam pat don kano ka jingkhot ïakren bad ka Seng.
