Shillong, Jymmang 05: Ka Shillong Lajong FC bad ka Janepih YSCA ki la pynskhem ïa lade ban bat ïa ka kyrdan ba nyngkong ha la ki jong ki jong ki Group hadien ba baroh ar ki la jop ïa la ki jong ki jingïalehkai jong ka lympung 5th Meghalaya State League hynne ka sngi Ba-ar.
Ka Lajong ka la pynliem noh da 3-0 ïa ka Lamyrsiang SCC ha ka Group E ha Wahiajer, katba ka Janepih ka la jop pyrshah ïa ka A’chik SCO Rongjeng da 4-1 ha ka Group G ha Williamnagar.
Ha kajuh ka por ka Mawphu SC ka la pynthikna ïa ka jaka ban rung sha ka pre-quarterfinal hadien ba ka la lah ban ïakhaid da mar 1-1 bad ka Mawlum Tyrsad SCC ha ka Group B ha madan MFA ha Shillong.
U Ebetstar Nongbet (25′) u la pynkhihjar nyngkong ïa ka Mawlum Tyrsad hynrei kham hadien katto katne por ka Mawphu ka la pynïakhaid lyngba u Banman Roy Nongsiej (39′). Baroh arliang ki la ïoh ïa ka jingkyrshan kaba paka ha madan hynrei dei ka Mawphu ka ban jam shakhmat sha ka wat ïakhun Round-16 hadien ba pyndep ha ka kyrdan ba ar na ka Group B.
Ha Williamnagar, u Akhebor Langrin (45′), u Pynshailang Kharsyntiew (55′) bad u Rishembhalang Wanniang (66′, 75′) ki la pynkhihjar na ka bynta ka Janepih, katba u Klubarth M Sangma (65′) u la thep ïa ka shi kol jong ka ASCOR – kaba dei artad ka kol ba nyngkong ba ka Janepih kan shah thep haki hynñiew sien ïakhun ha ka MSL 5. Hynrei kane ka kol kan long tang ka jingpyntngen kaba rit ïa ka ASCOR, kaba ym lah shuh ban rung sha ka thup kyrdan Top 2 ha ka Group G.
Ha Amlarem, ka Group C ka la sakhi ïa ka Laskein SCSC kaba la pynliem noh ïa ka Lamin XI SCC da 5-3 kol. Kane ka jingjop ka long kaba kongsan namar ka la kyntiew shipor ïa ka Laskein sha ka kyrdan ba ar, watla ka dang hap ban ap ïa ka jingmih jong ka jingïakhun mynta ka sngi hapdeng ka Amlarem SC pyrshah ïa ka Mawlai SC ban pynthikna la kan ïaid lyngba ne em sha ka pre-quarter.
U Bundaki Lamare (11′, 17′, 57′), u Rithrangmiki Biam (69′) bad u Wailad Damei Biam (90’+1) ki la pynkhihjar na ka bynta ka Laskein, katba ka Lamin XI ka la pynkhie im ïa ka jingïalehkai ha ki minit ba khatduh lyngba u Densil Kongwang (63′, 90’+2) bad u Genial Lamin (90’+3).
Ka jingïakhun ha Mairang ruh ka la jan sakhi ïa kajuh ka jingmih, ha kaba ka Umlakro SC ka la pynliem noh ïa ka Lawbah SC da 5-2 ha ka Group F. Kiba la pynkhihjar na ka bynta ka Umlakro ki long u Rishan Nonghyndah (19′), u Jewelstar R Marak (55′) bad u Chaster Makhroh (68′, 76′, 80′) uba la thep hat trik, katba ka Lawbah ka la thep lyngba u Nakibanshan Wanshnong (42′), Steppingstone Wanshnong (74′). Ka jingjop ka la rah ïa ka Umlakro na trai duh jong ka Group sha ka kyrdan ba lai.
Kumjuh ruh ka Mawshun SCC ka la kiew sha ka kyrdan ba lai ha ka Group A da kaba pynliem ïa ka Umkaber SCC da 6-1 ha SSA Stadium, Shillong. Baroh hynñiew tylli ki kol ki la wan ha ka kylla miet, ha kaba ka Mawshun ka la ïoh mad ïa ka jingjop ba nyngkong lyngba ki kol jong u Bradley Masynting (62′, 76’P), u Iarborkhiathew Khongnoh (69′, 86′) bad u Niki Khonglam (87′). Ka la don ruh ka kol ba la thep hi ha ka minit kaba 71. Ka Umkaber ka la pynphai shi kol ha ka 88 minit na u Bateilang Kharbteng
Ki ar tylli kiwei pat ki jingïalehkai ki la kut ha ka jingïakhaid da mar 2-2 kol.
Ka Group D ha Khliehriat, la sakhi ïa ka Ladthadlaboh SC bad ka Thangskai Tiger SC kiba la lamkhmat markylliang shuwa ban ïasam point. U Andrew Nanghuloo (7′, 90’+3) u la thep na bynta ka Ladthadlaboh bad u Phermedaki Syrti (65′) bad u Maiki Nongtdu (88′) ki la thep na ka bynta ka Thangskai.
Nangta ha Mawkyrwat, ha ka Group H, ka Seng Samla Umdang Pyllun ka la pynkhihjar lyngba u Rangkynsaistar Mawsor (71′) bad u John Paul Mawsor (88′), katba ka Mawlarshong SC ka la thep lyngba u Dadapbor Marwein (38′, 46’P). Na ka bynta u Rankynsaistar, u la pynjlan ïa ka jingthep kol jong u sha baroh hynriew tylli ki jingïakhun jong ka Umdang Pyllun haduh mynta.
Kane ka jingïakhaid ka mut ba ka Mawlarshong ka la khyllem noh na ka jingïakhun ban ïoh jaka ha ka pre-quarterfinal hynrei ka Umdang Pyllun kan hap ban ap 24 kynta ban tip ïa ka nusib jong ka mynta ka sngi.
