SHILLONG, Jymmang 05: Ka Meghalaya Gymnastics Association ka la phah ïa ka kynhun kaba don san ngut ki nongïalehkai gymnast kiba la mihkhmat ïa ka jylla ha ka Senior Artistic Gymnastics National Championship 2026–27 ha Bhubeneswar.
Kane ka Championship ka la sdang ha ka 29 tarik ïaïong haduh ka 03 tarik u Jymmang bad la pynïaid da ka Gymnastics Federation of India.
Kane ka kynhun ka kynthup ïa ki nongïalehkai gymnast kiba la kham rangbah (senior), ka Josephine Isabel Warjri, ka Bakmenhun Shangpliang, ka Wandalang Magdalene Malngiang, ka Athilia Susngi bad ka Edeva Synnah. ïa ka kynhun la synran da u Arjun Singh Kwairakpam kum u coach bad ka kong Lucy Mary Malngiang kum ka Team manager.
Watla ka kynhun kam shym la ïoh khur takma hynrei la ïohi ïa ka jingkiew kaba khraw jong ka sap ki nongïalehkai gymnast ka jylla ha kane ka jait jingïalehkai, la pynpaw ka MGA ha ka kyrwoh khubor hynne ka sngi Ba-ar.
Nalor kata, ka jingïashim bynta ha kum kane ka rynsan ïalehkai ba pawnam jong ka ri ka la ai ka jingtip kaba kordor ïa ki nongïalehkai, kaba la pynlah ïa ki ban pyni ïa la ka sap bad ban ïoh ïa ka jingshemphang ha ka jingïakhun pyrshah ïa ki nongïalehkai gymnast kiba kynsai tam jong ka ri.”
Ka MGA ka la ai khublei ruh ïa u Director ka Sports & Youth Affairs uba la ai ka jingkyrshan khnang ba ki nongïalehkai gymnast kin lah ban ïashim bynta ha kane ka National Championship.
Ka MGA ka la ong ba ka dang ngeit skhem ba, da kaba bteng ïa ka jingpyntbit bad ka jaka ïalehkai ba kyrpang, “kumba la kular da ka sorkar jong ngi” ki nongïalehkai jong ka Meghalaya kin ïoh ban khur takma na ka bynta ka jylla ha ki jingïakob ban wan.
