SHILLONG, Jymmang 05: Ka kynhun ïalehkai jong ka KV Happy Valley bad ka St Nanak Secondary School ki la pynthikna ïa ka jingïakhun phainal hapdeng jong ki ha ka lympung Shillong Cricket Association Inter School Under 18, hadien ba ki la jop ïa la ki jong ki jingïalehkai semi final hynne ka sngi Ba-ar.
Ka KV Happy Valley ka la pynliem noh ïa ka Sunrise Accademy da 57 ron, katba ka St Nanak Secondary School ka la jop da 9 wiket pyrshah ïa ka St.Anthony’s Higher Secondary School.
Haba phai sha ki jingïakhun, ka St. Nanak SS ka la jop ïa ka jingkynting pisa bad kam trai ban tied nyngkong, ha kaba ka la lah ban kamai 154 ron bad hap 3 wiket haduh kaba kut ki 16 ober. La lamkhmat ïa ka tied da u Ayush Kumar, uba la noh synñiang 70 ron naki 48 bol, katba u Piyush Kumar Ray u la kamai 44 ron naki 32 bol. U Obojit Paul u la khur 2/31 naki 4 ober.
Haba jubab ka Sunrise Accademy ka la ïohlad ban kamai tang 97 ron bad khyllem 7 wiket haduh kaba kut ki 16 ober, kiba kham pawkhmat ha ka tied ki long u Harsh (19 ron naki 21 bol) bad u Ayan Burman (18 ron naki 13 bol).
U Ashish Kumar u la long u nongkawang bol ba seisoh tam jong ka St Nanak SS, da kaba khur 2/8 naki 3 ober, hynrei ïa ka nam Player of the Match la khur da u Ayush Kumar uba la kamai 70 ron bad pynhap ruh 1 wiket ha ka boling.
Ha ka semi final kaba bud, la sakhi ïa ka St Anthony’s HSS kaba la tied pyndep ïa ki 20 ober ban kamai 105 ron bad khyllem 8 wiket. U Ayush Debnath u la noh synñiang 20 ron naki 16 bol katba u Samelawan u la ïarap 14 ron naki 14 bol. U Aman Chahal u la khur 2/7 naki 4 ober.
Ka jingnoh synñiang kaba khraw na u Aman kr Ray (44 ron naki 46 bol) bad u Udit Pradhan (39 ron naki 52 bol) ka la ïarap ïa ka KV Happy Valley ban pyndep ïa ka kamram, da kaba kamai 108 ron haki 20 ober bad hap tang shi wiket.
Na ka bynta ka jingïalehkai kaba kyrpang ha baroh ki liang, u Udit Pradhan (kamai 39 ron bad khur 1 wiket) u la khur ïa ka khusnam Player of the Match.
