Ka samla Swastika na Little Star HSS bad u Starwell na St. Paul’s HSS

Nongpoh, Jymmang 04: 2 ngut ki samla pule na Ri-Bhoi kila rah ïaka nam bad burom ïaka skul bad ka dong Ri-Bhoi baroh kawei hadien ba kila ioh ban rung haka thup Top-10 jong ka result HSSLC Arts Stream baka pynbna da ka MBOSE mynta ka sngi.
Kitei ki 2 ngut ki samla ki kynthup ïa ka samla Swastika Giri naka skul Little Star Higher Secondary School, Baridua kaba la rung ha ka kyrdan ba 5 bad khur haduh 440 marks bad u samla Starwell Ronghang na St. Paul’s Higher Secondary School, Nongpoh uba la wan ha ka kyrdan ba 9, u ba u la ïoh khur haduh 433 marks.
Naka liang ki nonghikai lem bad ki khynnah skul jong kitei ki 2 tylli ki skul mynta ka sngi kila shad kmen ban pynpaw ka jingkmen halor ka jinglah ban lehbha kitei ki 2 ngut ki samla bad ruh ban rah ïaka nam bad ka burom jong ka skul.
Na ka liang ka DN Sharma Principal ka skul Little Star HSS kala ong ba kane ka dei ka pork aba kmen eh ïaka skul bad khamtam ïaki nonghikai kiba la trei shitom bad ai mynsiem ïaki khynnah watla ki don tang 8 ngut namar bun naki khynnah ha katei ka jaka ki kwah ban leit sha Assam namar ka dei ruh ka skul kaba don ha khappud bad ka Assam, hynrei kane ka jingjop jong ka Swastika ka long ka nuksa ba kane ka skul ka don ka jinghikai kaba kyrpang kaba lah ban lam lynti ïaki khynnah.
Naka liang ka Swastika Giri bad kiwei pat ki khynnah ki la ai jingïaroh ïa ki bor pynïaid skul, khamtam ka Counsellor ka Megha Sharma, kiba la ïarap bad btin lynti ïa ki haduh ba kin lah ban poi sha ka thong.
Lyngba kane ka jingjop ka pyni shai ïa ka jingminot bad ka jingtrei shitom jong ki khynnah lem bad ka jingaiti lut jong ki nonghikai, kaba la wanrah nam bad burom ym tang ïa ki skul hynrei ïa ka distrik Ri-Bhoi baroh kawei.
Haba phai pat sha ka skul St. Paul’s HSS naka liang ka ki nonghikai tang mar sien ïoh jingtip ba u samla Starwell u la rung haka thup top-10, ki nonghikai ki la pyrshang ban phone ïa u hynrei kim shym la ïoh, bad khlem pynslem ki la leit ban shaw ïa u na iing sah jong u bad pdiang burom ïa u ha phyllaw skul. U Starwell u la pynpaw ïa ka jingsngewnguh ïa u Blei, ki nonghikai, ki kmie ki kpa bad baroh kiba la kyrshan ïa u. U la ïathuh ruh ba u ju pynlut haduh 10-12 kynta man ka sngi ban khrehkot, kaba la long ka dawbah jong kane ka jingjop.
Ka Sister Anjellina CH Marak, Headmistress, bad ka Kong Sweety Shadap, Class Teacher, ki la pynpaw ïa ka jingsngewkmen kaba khraw bad ka jingsarong halor ka jingwanrah nam jong utei u samla ïa ka skul bad ïa ka dong Ri-Bhoi hi baroh kawei.