Shillong, Jymmang 03: Katba nang mih ki Sngi ka surok hapoh Garikhana bad kaba dei ruh ka jaka ïeng Jeep ne ka Stand Jeep ha Nongbah Shillong ka la nang sniew dur katba nangmih ki Sngi bad kane ka surok ka la nang jot nang sniew bad kane ka la nang wanrah ka jingeh kaba khraw ïa kiba bun ki kali kiba ju ïaid na kane ka surok manla ka Sngi.
Kane ka surok la ïohi ba mynta ka la nang dap tang da ki thliew ki syar suda bad kumjuh ruh ka jingktieh kaba la ktah bha ïa ka ïaid ka ïeng jong kiba bun ki kali manla ka Sngi.
Kane ka surok kaba la dei ban maramot naduh mynno ka kam ha ka jingshisha ka la dei ban ïaid shakhmat hynrei kumba la ïohi ba na kane ruh ka surok la hap ruh ban thep ïa ki pipe um jong ka Tnat Public Health Engineering (PHE) haba ïadei bad ka jingpynpoi umbam umdih sha ka sor Shillong, hynrei na ka jingslem pat ka kam na ka liang ki bor badei peit kim pat lah ban maramot noh ïa kane ka surok bad kane ka jingslem pynban ka la nang wanrah pynban shibun ki jingeh ia ki nongleit nongwan na kane ka surok manla ka Sngi.
Kane ka surok ym tang ba ka la dap bad don bun ki thliew ki syar suda ka long ruh ka jingeh khamtam eh ha kine ki Sngi ba slap ha kaba kane ka surok la ïohi ba ka la dap tang da ka ktieh kumta ka la long kaba pynjynjar shuh shuh ïa ki paidbah, khamtam kiba ñiah kali naduh ki saw shaka haduh ki ar shaka ruh kumjuh.
Kumta lada na ki bor pynïaid badei peit kim lah ban shimkhia ha ka ban maramot noh kloi ïa kane ka surok ha kine ki por, kan sa nang shim por shuh shuh ban maramot ïa kane ka surok namar ka aïom por lyiur ne ka por slap ka la wan bad kan sa shu long lehnohei bad shu pynlut kai ïa ka pisa u paidbah lada maramot pat ha ka por ba la slap bad kane ka surok kan sa nang ïaijot bad sniewdur hi manla ka por, kumta ladei ïa ki bor badei peit kum na ka Tnat PWD ne ka National Highway ba kin pynsted noh ban ïakren pynbeit noh kloi bad ka Tnat PHE ha kaba ïadei bad kane ka jingeh jong ka jingsniew palat ka surok kaba wanrah jingeh ïa ki paidbah manla ka Sngi.
