La dep pynkhreh ïa ka DPR ban pynbha pat ïa ka jingpynjot ïa ka mariang na ka jingtih dewïong be-aiñ

Shillong, Jymmang 3 : Ki kam ban pyndap ne btep khyndew iaki krem dewiong ba la tih beaiñ bad ban pynbha pat ïa ki jingpynjot ïa ka mariang na ka jingtih dewiong beaiñ ha Meghalaya ka la ïaid shakhmat bad la dep ruh ban pynkhreh ïa ki Detailed Project Report (DPR) jong ki artylli ki pilot project tang ba dang ap ïa ki kaiphod na ki bor Synshar District ong ka Justice BP Katakey Committee ha ka kaiphod ba 37 ba la aiti sha ka ïing Bishar High Court ka jylla.
Ka kaiphod ka batai bniah ïa ka jingïaid ki kam ba ïadei bad ka jingkhang dam ïa ki par dewiong bad ka jingynbha bha ïa ki jaka ba shah ktah na ka jingtih par, haba pynpaw ba watla ki jingpynkhreh ïa ki kot ki sla halor kine ki pilot project ki dang sdang, ka jingbuddien na ki bor District ka ïïaid suki bha.
Kat kum ka kaiphod, ka Central Mine Planning & Design Institute Limited (CMPDIL), ka shnat treikam ka Coal India Limited, ka la aiti ïa ki DPR ba khatduh jong ki artylli ki pilot project ha ka 5 tarik Lber, 2026.
Ki artylli ki jaka kiba la dep ithuh ki dei “kawei ka thup jong ki par dewiong ba la iehshrah ha shnong Sutnga, East Jaintia Hills kaba don ïa ka jingheh ka jaka haduh 10 hectare” bad “kawei pat ka dei ki par dewiong ha ki par ka Arenggitim Hills ha South Garo Hills kaba ka jingheh ka jaka ka long 40 hectare”.
Ki project ki kynthup ïa ka jingkhang dam ïa ki par, pynbud da ka jingpynbha bad ban thung ïa ki dieng ki siej.
Ka CMPDIL ka la shah thung kum ka Project Management Consultant ha ka 6 tarik Jylliew 2024, katba ka Meghalaya Industries Development Corporation (MIDC) kum ka Project Implementation Unit.
“ïa ki DPR ba khatduh lah dep ban phah sha u Member Secretary, ka Techninal Committee ka MEPRF, uba la ai pat ka jingbatai ïa baroh artylli ki project” ong ka kaiphod.
Ka Technical Committee, ha ka jingïalang ba long ha ka 27 tarik Lber, 2026, “ka la rai ban phah ïa baroh artylli ki jingtyrwa sha ka Oversight Committee ka MEPRF ban ai jingmynjur, ka ban pynbud pat da ka jingkhot tender bad kiwei kiwei, da ka PIU jong ka project, ka MIDC”.
Ka Committee kala pynpaw ba ka Tnad Mining & Geology ka la “thoh sha baroh ki Deputy Commissioner ba dei khmih lyngba ka shithi No. MG.57/2021/335, ba 12.02.2026, ba kin phah ïa ki jingtyrwa ban khangdam ïa ki par.
“Hynrei, ym pat shym la ïoh satia ïa kino kino ki jingtyrwa kat haduh kine ki sngi” ong ka kaiphod.
Ka jubab na ki District ka ïapher kawei na kawei pat. U Deputy Commissioner ka East Jaintia Hills, u pyntip ba ki jingtyrwa ban ithuh ïa ki par “lah dep ban phah sha ka Office jong u Executive Engineer ka PWD (Building), Jowai ba kin khmih bniah ïa ka” hynrei “haduh mynta ym pat shym la phah pat ïa ka jubab sha ka Ophis”.
U Deputy Commissioner ka South Garo Hills, ula pynpaw “ïa ka jingthut ka shongsuk shongsaiñ ha ri-lum Garo” kum ka daw ka jingeh ban leit leh ïa ki sorjamin ban lah tyrwa ïa ka jingkhang dam ïa ki par hapoh ka por bala buh.
Ha South West Khasi Hills, 83 tylli ki par lah dep ban ithuh bad dep phah sha ka Directorate of Mineral Resources “ryngkat bad ki dur bad ki GPS , khlem da ïoh ïa ka jingbit bad jingpdiang jong ki trai par”. La bthah mynta ïa ki Ophisar “ba kin pynïoh ïa ka jingbit bad jingpdiang na ki trai par ban khangdam noh ïa ki par jong ki, kiba la iehshrah bad ban pynbha pat ïa ka mariang kaba la shah pynjulor”.
Ka kaiphod ka bynta ba “ym pat ïoh pdiang satia ïa kano kano ka kaiphod na ka Deputy Commissioner ka West Khasi Hills District”.
Ka jingai khubor ba khatduh jong ka Directorate of Mineral Resources lah phah sha u Project Coordination for Mining Area Reclamation, kaba la phah ruh sha ka CMPDIL, ha ka 9 tarik Rymphang 2026.