La bthah ban pyrkhing ïa ki SOP bad pyndait ïa ki kor GPS ban tehlakam ïa ka jingtih dewïong be-aiñ

Shillong, Jymmang 3 : Ka kaiphod ba 37 jong ka Justice BP Katakey Committee ba la aiti sha ka ïing Bishar High Court, ka la ai jingmut ïa ki lad ki lynti ba thymmai ban tehlakam ïa ka jingtih bad jingshaslan dewiong beaiñ kynthup ka jingpyntreikam pyrrkhing ïa ka SoP 2024, jingpyndait GPS ha ki trok, ki khyrdop kiba don ki kor ki bor kat kum kane ka juk mynta (smart check-gate) bad ka jingtynrong shimet ïa ka jingkitkhlieh ha ki Ophisar.
Ka Committee kala pynpaw ïa ki jingdkoh ha ka jingpyntreikam bad jingpynslem ha ki jingbthah ba la ai mynshuwa haba lum thup ïa 21 tylli ki jingai jingmut na ka bynta ka jingshong pyrkhat jong ka ïing Bishar ban khang syndon ïa ka kam tih dewiong beaiñ hapoh ka Jylla.
Ka Committee kala ban jur ïa ka “jingpyntreikam pyrrkhing ïa ki kyndon bapher bapher jong ka SoP, 2024, khnang ban khanglad ïa ki kam tih dewiong beaiñ, kynthup ka jingshalan ïa u dewiong napoh bad shabar jong ka Jylla Meghalaya, lym kumta kan ym long kaba lah ban khang ïa ki kam tih dewiong beaiñ”.
Kala kyntu ruh ban pynshisha ïa ki kot ki sla bala ai da ka M/S Star Cement Meghalaya Limited bad Star Cement Limited ha ka “jingshalan ïa u dewiong ba 2,93,569.349 MT da ki 8174 tylli ki trok hapdeng ka 02/01/2025 haduh 28/02/2026” bad dawa ban leh eiei “lada jia ba ym don/ lah ban ai ia kino kino ki kot ki sla, kiba donkam ban ai hapoh ki kyndon ka SoP”.
Ka kaiphod kala ai jingmut ruh ban tohkit ïa ka jingpynkheiñ ïa ki SoP, haba kdew ba ka trok ba don u nombor ML-11-A-1473” kaba la akisen ha ka 04/03/2026 ha shnong Byndihati kaba la wanrah ïa ka jingmynsaw ïa bun ngut ki briew bad ka jingiap jong kawei ka kynthei,” haba ïadei bad ka Khliehriat PS Case No 106(03)/2026.
Ban pyrrkhing tyngeh ïa ka jingpeitngor ia ka jingïaid u dewiong, ka Committee kala ai jingmut ban pynkylla ïa ki rukom pynïaid ïa ka jingshalan ïa u dewiong na ki mining lease.
Kala ai jingmut ban “pyndonkam ïa ki kali ba pyndait ïa ki Global Positioning System (GPS) devise ban shalan ïa u dewiong” ha ryngkat ka jingai jingtip ba bniah sha ka Directorate of Minerals Resources, Shillong.
Kiwei pat ki lad ki lynti ki kynthup ïa ka jingtah ïa ki sticker bala jied kyrpang ïa ki rong, ki ban ai da ka Directorate of Mineral Resources, Shillong, kiba hap ban tah ïa ka bynta ba lah ban ïohi bha jong ka ïit ba shakhmat ka kali bad ka “jingbuh ïa ki lynti ïaid sha ka jaka pynpoi mar bad ka jingpyntreikam ïa ka Smart Integrated Exit Check-Gate (s) kaba hap ban ïaid lyngba ki trok”.
Ka Committee ka bthah ruh ban phah pyni ïa ki “invoice/E-Way Bills kaba long kat kum ki kyndon ka GST, ka certificate of origin, ka weighment slip bad transit pass ha ka exit check-gate da ki nongkhaïi”.
Ka kaiphod ka tynruh ban pynïeng ïa ki Integrated Smart DMR Check-Gates ha ki jaka kiba ïahap ha ka surok kynthup ka Nangalbibra-Mendipathar Railway Station, Rongjeng-Dainadibu bad Nangalbubra-Gasuapara.
La ai jingmut ruh ban pynïeng ïa ka smart check-gate ha ka thaiñ Athiabari ha South West Khasi Hills District bad marjan ka Athiabari Police Outpost ban khanglad ïa ka jingshalan ïa ki dewiong ba tih beaiñ sha Assam.
Halor u dewiong ba tih beain, ka Committee ka ong ba dei ban shim ïa ka sienjam ban shalan noh ïa u dewiong ba tih beaiñ uba la don haduh 1,55,390.6 MT, ha kaba 1,92,840.13 MT la lap da ka M/S Garuda UAV ha ka jingleh aerial survey” ban ithuh ïa ki depot, bad ban pyndep ïa ka jingshalan hapoh ki taiew ba kut u Iaiong 2026. Kala bynrap ba ka jinglilam ïa u dewiong ka dei ban ïaid hadien ba ïoh ïa ki hukum kiba donkam.